Германия қорғаныс министрі Еуропадағы соғысқа дайындалуға шақырды
БЕРЛИН. 30 қазан. Германия қорғаныс министрі Борис Писториус Таяу Шығыстағы қарулы қақтығыс пен Ресейдің Украинадағы соғысы Еуропадағы соғысқа алып баруы мүмкін екенін айтты. Бұл туралы The Moscow News ақпарына сүйенген rast.kz хабарлайды.
ZDF басылымына берген сұхбатында қорғаныс министрі қазір әлемнің соғысқа қарай бет бұрып келе жатқанына назар аударды.
«Біздің тағы да Еуропада соғыс қаупі тууы мүмкін деген ойға бой үйрете беру қажет», – деді ол. Осыған байланысты Германия өзін өзі қорғай алатын болуы тиіс – мұның бундесверге де, қоғамға да қатысы бар. «Біз соғысқа дайын болуға тиіспіз», – деп атап өтті Писториус.
Қорғаныс министрлігінің басшысы үкімет жаңа қауіп-қатерлерге өте баяу мән беріп келеді деген айыптауды жоққа шығарды. Ол бундесверде қайта құру жұмыстары жүргізілгенін еске салды. Сондай-ақ Ресей Украинаға басып кіргеннен кейін құны €100 млрд болатын арнайы қор құрылды.
«Бұдан тез болуы мүмкін емес», – деді министр сосын. Ол бундесвердің құрылымы 30 жыл бойы қиратылғанын айтты. «Оны 19 айда түгел қалпына келтіру де мүмкін емес», – деді тағы. Сонымен бірге Писториус «осы онжылдықтың соңында Германия мүлде басқаша жағдайда болатынын» жеткізді.
Бұдан бұрын кең ауқымды соғыс болып кету қаупі бар екенін Франция мен Ұлыбритания ескерткен еді.
