Президент Теміртауда апат орын алған Костенко атындағы шахтаға барды
ҚАРАҒАНДЫ. 28 қазан. Мемлекет басшысы Қасым-Жомарт Тоқаев Теміртау қаласындағы Костенко атындағы шахтаға барып, қаза тапқан кеншілер отбасыларына көңіл айтты. Бұл туралы Ақорда баспасөз қызметінің дерегіне сүйенген rast.kz хабарлайды.
«Президент Қасым-Жомарт Тоқаев Қарағанды облысында «АрселорМиттал Теміртау» акционерлік қоғамына қарасты Костенко атындағы шахтада болған өрт салдарынан қаза тапқан кеншілердің отбасылары мен туған-туыстарына көңіл айтты», – делінген хабарламада.
«Мен Мемлекет басшысы ретінде баршаңызға көңіл айтамын. Бұл – қасірет. Бәрін түсінемін. Апат болды. Апаттың кесірінен көптеген адам қаза тапты. Сондықтан бұл жерге арнайы келдім. Тиісті шаралар қабылдаймыз, соның ішінде зардап шеккендердің отбасыларына көмек көрсетеміз. Қаза тапқандар мен зардап шеккендердің отбасылары ешқандай мұқтаждық көрмеуі үшін Үкімет, әкімдік және қайырымдылық ұйымдарының алдында жан-жақты көмек көрсету міндеті тұр», – деді Президент.
Мемлекет юасшысы 29 қазанның бүкіл еліміз бойынша Жалпыұлттық аза тұту күні болып жарияланатынын айтты. Сонымен қатар «АрселорМиттал Теміртау» компаниясына қатысты тиісті шара қабылданатынын мәлімдеді.
«Ертең бүкіл еліміз бойынша жалпыұлттық аза тұту күні жарияланады. Мен «АрселорМиттал Теміртау» компаниясымен инвестициялық ынтымақтастықты тоқтату жөнінде тапсырма бердім. Бұл мекеме Үкіметпен және кәсіпорынмен ынтымақтастық тұрғысынан біздің тарихымыздағы ең нашар компания болды. Енді кәсіпорынның өзіне қатысты шаралар қабылдау туралы ойлануымыз керек. Басин Вадим Борисович деген азамат бар. Сіздер оны білесіздер. Ол бір кездері «АрселорМитталда» жұмыс істеген. Облыс әкімінің орынбасары болды. Мен оған қайтып келіп, кәсіпорынды басқаруды тапсырамын. Кәсіпорынның қазіргі басшылығының қолынан ештеңе келмейді», – деді Қасым-Жомарт Тоқаев.
Президенттің айтуынша, жер астында қалған кеншілерді құтқару, зардап шеккен және қаза болған азаматтардың отбасыларына жан-жақты көмек көрсету кезек күттірмейтін міндет болып тұр.
«Ең алдымен, құтқару жұмыстары жүргізіледі. Екіншіден, зардап шеккендер мен медициналық көмекке мұқтаж азаматтардың нақты санын анықтауымыз керек. Үшіншіден, осы апаттан зардап шеккендердің барлығының отбасына материалдық көмек көрсетеміз. Егер қажет болса, арнайы қор ашамыз. Мұнымен өзім айналысамын», – деді Тоқаев.
Ол сонымен қатар қазіргі уақытта кеншілердің зейнетке шығу жасына қатысты мәселе қарастырылып жатқанын баяндады
Еске сала кетейік, бүгін таңертең Қарағанды облысының Теміртау қаласында апат орын алғаны жайлы хабар тараған болатын. Атап айтқанда, сондағы «АрселорМиттал Теміртау» компаниясының көмір департаментіне қарасты Костенко атындағы шахтада өрт шыққан. Дәл сол кезде кеніште 252 адам кен қазып жатқан. Олардың 205-і жер бетіне шығарылып, 18-і медициналық көмекке жүгінді.
Соңғы сәттегі мәліметтер бойынша қаза тапқан 28 шахтердің мүрдесі табылғаны белгілі болды, тағы 18 кеншіні іздеу жұмысы жалғасуда.
Мемлекет басшысының тапсырмасына сәйкес Премьер-Министр Әлихан Смайыловтың төрағалығымен апаттың себептерін тергеу және оның салдарын жою жөніндегі Үкіметтік комиссия құрылды.
