Қазақстаннан 500 млн доллар сыртқа кетті күдік бар
АСТАНА. 27 ақпан. Қазақстанна аумағынан 500 млн доллар көлеміндегі қаржы шетелдерге заңсыз шығарылып кетті деген күдік көтеріліп жатыр. Бұл туралы «Azattyq ryhy» хабарлады.
Қаржы министрлігі қазір бұл қаражаттың қайда жұмсалғанына зерттеу жүргізіп жатыр.
Кеше Премьер-министрдің орынбасары-Қаржы министрі Әлихан Смайылов қол астындағы қызметкері Ғабит Лесбековтің (Қаржы министрлігі қаржы мониторингі комитеті төрағасының орынбасары – авт) Сенатта айтқан мәлімдемесіне түсініктеме берді. Лесбеков Сенатта Қазақстаннан шетелге 27 трлн теңге шыққанын хабарлаған еді. Қазақстандықтардың көбі бұл қаражат шетелге заңсыз шыққан деп түсініп, қаржы шекарамыздың қауіпсіздігіне күмәнмен қараған болатын. Министр бұл қаражат заңды айналыммен шыққанын және қандай бағыттарда айналымда болғанын түсіндірді.
«27 трлн теңге туралы теріс түсіндірме берілген. Шын мәнінде бұл операциялардың барлығы екінші деңгейлі банктер арқылы іске асқан операциялар. Бұл соманың жартысы импорт тауарларды сатып алуға жасалған төлем, тағы бір бөлігі резидент емес адамдардың қызметі үшін төленген ақы, ақшаның тағы бір бөлігі халықаралық нарықтардан алынған қаражатты жабуға кеткен ақша, тағы бір бөлігі бұдан бұрын Қазақстан нарығына салынған инвестицияның дивиденті ретінде төленген ақша. Осы транзакциялардың барлығы сол 27 трлн теңге ішіне кіреді», – деді Қаржы министрі Әлихан Смайылов.
Дегенмен, Смайылов осы 27 трлн теңге ішінде заңсыз шығуы мүмкін қаражат бар екенін жоққа шығарған жоқ.
«Қаржы мониторингі комитеті төрағасының орынбасары айтқан соманың кішкене бір бөлігі, шамамен 500 млн доллар, заңсыз шығарылған болуы әбден мүмкін. Тәуекелдер өте жоғары. Әр операция бойынша тиісті аналитикалық жұмысты жасаймыз. Заңсыз шықты ма, жоқ па, тергеу органдары анықтайды», – деді Смайылов.
