USD
ПХЕНЬЯН. 9 қыркүйек. КХДР лидері Ким Чен Ын жақында болатын кездесулері кезінде Владимир Путинмен арада қару-жарақ пен оқ-дәрі сату жөнінде келісім жасасуға дайын отыр. Бұл туралы The Moscow News дерегіне сүйенген rast.kz хабарлайды.
Солтүстік Корея басшысы Ким Чен Ын мен Ресей президенті Владимир Путиннің арасында Владивостокта таяуда өтетін кездесудің ең басты тақырыбы милитаристік басқыншы елдің өзінің шығыстағы әріптесінен оқ-дәрілер сатып алуы болмақ.
Financial Times атап көрсеткендей, дегенмен, әзірге бұл жолғы келісімнің ұңғыл-шұңғылы толық белгілі болып отырған жоқ.
Басылымның пайымынша, Пхеньян Мәскеуге оқ-дәрілер, ракета кешендері мен қысқа қашықьықтағы баллистикалық ракеталар ұсынуы мүмкін – олардың бәрі Кремльге Украина сарбаздарының қарсы шабуылына тойтарыс беруге көмектесер еді. РФ бұған жауап не алғыс ретінде КХДР-ға астық, мұнай мен валюта беруі ықтимал. Ресей сондай-ақ әріптесіне «сезімталдығы жоғары әскери технология» ұсынып қалуы да ғажап емес. Бұл Солтүстік Кореяның Оңтүстік Корея және Жапония сияқты «дұшпан» көршілеріне қоқан-лоққы жасауы үшін қажет.
The New York Times газеті Ким Чен Ынның қыркүйек айында Ресейге келгелі жатқанын жазды. Бәлки, ол сондай-ақ Мәскеуге де келіп кетуі мүмкін. Бірақ бұл ақпар әлі расталған жоқ.
Ақ үйдегілер 29 тамыз күні Владимир Путин мен Ким Чен Ынның арасында хат жазысу орын алғанын баяндады. Онда Ресейдің қару сұрап отырғанына болжам жасалды.
Дүйсенбі, 4 қыркүйек күні The Korea Times басылымы Оңтүстік Корея ұлттық барлау қызметінің мәліметтеріне сілтеме жасай отырып, Ресей қорғаныс министрлігінің басшысы Сергей Шойгудың Ким Чен Ын жолдасқа бірлескен әскери жаттығу өткізуді ұсынғанын атап өтті. Ал Солтүстік Корея өзі құрылған уақыттан бері бірде-бір рет басқа елдің әскери құрамаларымен бірге жаттығу өткізіп көрмеген екен.
Биылғы шілде айында сол Шойгу Пхеньянға арнайы барып қайтқан болатын.
