USD
ЕРЕВАН. 4 қыркүйек. Армения премьер-министрі Никол Пашинян Арменияның Ресейге қауіпсіздік саласында тәуелді болуы «стратегиялық қателік» болғанын мәлімдеді. Бұл туралы The Moscow News дерегіне сүйенген rast.kz хабарлайды.
«Ресей барған сайын Оңтүстік Кавказдан алыстап барады, Армения өз қауіпсіздігінің архитектурасын құруда тек соған ғана үміт артып отыра бермеуі керек еді», – деді Пашинян француздың La Repubblica газетіне берген сұхбатында. Республика билігі осы кезде өзінің сол «стратегиялық қателігінің» зардабын қатты шегіп отыр, енді өз елін қорғау үшін стратегиясын «әртараптандыруға» талпынып жатыр. «Бүгінде Ресейдің өзі қару-жарақ пен оқ-дәріге қатты зәру болып отырған кезде оның тіпті қанша қалап тұрса да, Арменияның қауіпсіздік саласындағы талап-тілектерін қамтамасыз ете алмайтыны айтпаса да түсінікті», – деді Пашинян Мәскеудің Украинада басқыншылық соғыс жүргізіп жатқанын ишара ете отырып.
Армения премьер-министрі Ресейдің Қарабақтағы бітімгер контингентін өз міндетін дұрыс орындамайды, соның ішінде 2020 жылы ұрыс қимылдары тоқтағаннан кейін қол қойылған Мәскеу, Ереван және Баку арасындағы үш жақты келісімде атап көрсетілгеніне қарамастан, аталмыш өңірді Армениямен жалғастырып отырған жалғыз жол – Лашын дәлізіне бақылау жасай алмай отыр деп айыптады. «Неге? Мұның екі себебі болуы мүмкін: не бұған Ресей Федерациясының шамасы жетпейді, не Лашын дәлізіне бақылау жасағысы келмейді. Мұның екеуі де оңып тұрған жоқ», – деді ол.
Пашинян сондай-ақ Мәскеудің «батыс мемлекеттері Арменияны бізге қарсы айдап салып отыр» деген сандыраған қайтарып тастады. Кремльдің ойынша, олар Ресейді Оңтүстік Кавказдан ығыстырып шығаруға құштар екен-міс. Ал армян басшысы бұған «Ресей өзінің осы кезге дейін мұнда атқарған және атқара алмаған әрекеттері негізінде өңірден өзі кетеді» деген түсіндірме берді.
