USD
МӘСКЕУ. 8 тамыз. Ресей диктаторы Владимир Путиннің талап етуі бойынша РФ-да соңғы 50 жылдың тарихы қайта жазылып шықты. Бұл туралы «Интерфакс» ақпарына сүйенген rast.kz хабарлайды.
Демек, орыс-кеңес-ресей тарихы үшінші мәрте бұрмаланып, қайта жазылып отыр. Дәуір жылнамасы бұған дейін Екатерина Екіншінің, Сталиннің билігі тұсында екі рет өтірік тарих жазылып шыққанынан хабардар еді, енді бұлардың қатарына Путиннің кезіндегі жойдасыз жалған деректер қосылып тұр.
«Ол – орта мектептің 10-11 сыныптарының соңғы 50 жылдың оқиғаларына қатысты бөлімдері «толық қайта жасалған» мазмұндағы бір текті тарих оқулығы», – деді Ресей президентінің көмекшісі Владимир Мединский.
«70-ші, 80-ші, 90-шы, «нөлдік» [2000-шы] жылдар туралы түбірінен қайта жазылып шықты», – деді ол. Мұнымен қатар, бұл оқулыққа 2014 жылдан 2023 жылға дейінгі аралықты қамтитын тағы бір тарау қосылған. Былайша айтқанда, Қырымның аннексиясынан бастап Украинаға кең ауқыммен басып кіруден тұратын агрессиялық соғыс жаңа тарихта толық суреттеледі. Әлбетте, бәрі РФ диктаторының кейінгі кездері әр жиында айтып жүрген сандырақтары тұрғысынан сөз етіледі.
Мединский осыған орай «авторлар бұл оқиғалардың бәрін түгел өз қолдарымен жазып берді», – деді.
РБК сол оқулықтан фото жариялады. Ондағы «Украинамен соғыс» деген 17-ші параграфта «Украина – неонацистік мемлекет», «АСО және Ресей қоғамы» және «Ресей – батырлар елі» деген тараулар бар.
Оқулық, атап айтқанда, оқушыларға «Украинаның ультраұлттық мемлекет» екені, онда «бөгде ойдың адамдары қуғынға ұшырайтыны», «оппозицияға тыйым салынатыны», ал «барлық орыстардың жау саналатыны» сөз етіледі. Оқулықта сондай-ақ АҚШ «соңғы украин қалғанша соғысқалы отыр», ал Батыс «Ресейдің 300 млрд-тан аса активін «ұрлап алды» деген сияқты жолдар бар.
Мединскийдің өзі Украинаға қатысты оқиғалардың бәрін өзі жазып шыққанын мақтанышпен жеткізді. Ол мұнда цифрлар мен нақты оқиғалардан гөрі куәлардың сөздеріне көбірек жүгінгенін білдірді.
Бір сөзбен айтқанда, РФ диктаторы өз елінде істеп отырғандарының бәрін Украинаға апарып жапсыра салыпты. Бұдан өткен аярлық пен алаяқтық, екіжүзділік пен ұятсыздық, өтірікшілік пен суайттық, оңбағандық пен жексұрындық болар ма!
Оқулықтар биылғы 1 қыркүйектен бастап 10-11 сынып оқушыларына оқытыла бастайды.
Тарихқа тағы бір фейк келіп қосылды.
