Зеленьский одақтастарына қарсы шабуылды жылдамдатуға уәде берді
КИЕВ. 23 шілде. Украина президенті Володимир Зеленьский Украина Қарулы күштерінің жақын арада қарсы шабуылдың жаңа кезеңіне көшетінін айтып сендірді. Бұл туралы Financial Times ақпарына сүйенген rast.kz хабарлайды.
Президент мұны Аспенде өткен қауіпсіздік жөніндегі халықаралық форумның шеңберінде айтты.
Ол жақында елдің шығысында бұрын жоспарланған қарсы шабуылдың қару-жарақ пен оқ-дәрінің жетіспеушілігінен кешірек басталғанын мойындады. Бұл Ресейдің Украина Қарулы күштері жолдарын миналап тастап, қорғаныс желісін жасап алуына мүмкіндік беріп қойды. Алайда украин президенті майдандағы ахуалдың таяуда өзгеретінін мәлімдеп, одақтастарды алысқа ататын қару-жарақтар мен алдыңғы қатарлы истребительдерді көптеп беруге шақырды.
Форумда АҚШ президентінің ұлттық қауіпсіздік жөніндегі кеңесшісі Джейк Салливан Украинадағы соғыс қимылдарының нәтижесі Киев түгел өз күштерін іске қосқасын ғана айқындалатынын мәлімдеді. Ол украин билігінің қарсы шабуыл үшін алдыңғы қатарлы истребительдер керек дейтін позициясының дұрыс емес екенін, себебі, соғыста авиацияның белсенді қимыл көрсетуіне әуе қорғанысы күштерінің кедергі келтіретінін айтты.
Ұлыбритания сыртқы істер министрі Джеймс Клеверли Украина мен Батыс міндеттемелері арасындағы алшақтықты түсінетінін, өйткені, әр тараптың өз басым жақтары болатынын баяндады. «Жетістікке жетуге талпыныс жолында украин басшылығы мен басқа елдер арасында бірқатар түсініктер айырмашылығы әрдайым болып тұрады», – деп атап өтті ол.
