USD
НАНКИН. 10 шілде. Қызылорда облысының әкімі Нұрлыбек Нәлібаев бүгін Қытайдың Цзянсу провинциясының губернаторымен өзара тиімді ынтымақтастық орнату жөнінде келісімге келді. Бұл туралы Қызылорда облыстық қоғамдық даму басқармасының дерегіне сүйенген rast.kz хабарлайды.
Аймақ басшысы облыстың инвестициялық әлеуетін таныстыру барысында Цзянсу провинциясының губернаторымен келіссөздер жүргізген. Ол өңірлер арасындағы экономикалық, іскерлік байланыстарды кеңейту мен дамытуға бағытталды.
Нұрлыбек Нәлібаев кездесуде Сыр өңірінің агроөнеркәсіптік кешені, жеңіл өнеркәсібі, құрылыс индустриясы, оның ішінде шыны, цемент, кальцийленген сода өндірісі, логистика, туризм, мұнай-газ секторы, энергетика секілді салалардағы инвестициялық мүмкіндіктері жайлы айтып берді. Ол өз сөзінде сондай-ақ, инвесторларға көрсетілетін мемлекеттік қолдау туралы әңгімелеп, қазіргі таңда көптеген халықаралық компаниялар өнеркәсіптік кәсіпорындарын оқшаулау алаңы ретінде Қызылорда облысын таңдайтынын атап өтті.
Облыс әкімі инвестициялық жобаларды іске асыру мүмкіндігін қарастыруды ұсынды және Меморандумдарға қол қоюға шақырды.
Еске салсақ, ҚР Үкіметі мемлекеттік қолдау ретінде инвестициялық келісім-шарт шеңберінде жеңілдіктердің ауқымды пакетін ұсынды. Олар — кедендік баждардан босату, мемлекеттік заттай гранттар, салық жеңілдіктері, инвестициялық субсидиялар. Сондықтан қолданыстағы заңнама шеңберінде мемлекет тарапынан жеңілдіктер мен қолдау шараларын алу сүйемелденеді.
Ауқымды және басым жобаларды іске асыру үшін әлеуетті инвесторларға барлық қолайлы жағдайлар жасалады.
Айта кетейік, Қызылорда облысы әкімінің бұл сапары барысы Қытайдың орталық телеарналарынан көрсетілуде.
Тағы бір айтатын нәрсе, Цзянсу Қытайдың аграрлық және индустриялық өнімдер шығаруда алдыңғы қатарда тұрған, экономикалық жағынан қарқынды дамыған, сондай-ақ тұрғындардың тұрмыстық деңгейі жоғары провинцияларының бірінен табылады.
