Наргиз Z-әнші Ирина Дубцованың Ташкентте концерт қоюына қарсы шықты
ТАШКЕНТ. 22 маусым. Өзбек әншісі Наргиз Закирова ресейлік z-әнші Ирина Дубцованың Ташкентте концерт қоюына қатты наразылық білдірді. Бұл туралы bloknot.ru дерегіне сүйенген rast.kz хабарлайды.
«Кеңес және өзбек әншісі Наргиз Закирова өзінің Telegram-каналында Ирина Дубцованы боғауыз сөздермен қорлады. Оны ресейлік әріптесінің 25 маусымда Ташкентте өтуі жоспарланып қойылған концерті ашуландырды», – делінген РИА «Новости» хабарламасында.
«Несіне бұл *** қоқсықтар (шваль) Ташкентке өңмеңдей береді?» – деп жазды Наргиз.
Алайда Дубцова өзінің тарапына айтылған бұл сөздерге әзірге ешқандай ишара білдіріп, жауап қайтарған жоқ.
Жалпы, бұл Наргиздің ресейлік музыканттарға қарсы шығуының алды емес. Ол өткен жылғы қараша айында, мысалы, Ташкент көшелерінің біріне ілінген Филипп Киркоровтың афишасына қатысты да қарсылық сөздерін бұрқыратқан еді. Сол жолы Закирова ресейлік кезекті z-әншіні боғауыз сөздермен балағаттаған болатын.
Кейінірек Филя Наргизге жауап қайтарып, оны біраз ақылға шақырғандай болған.
«Қаптап келіп жатыр ***** жексұрындар», – деді ол сонда осы сәт түсірілген видеоны желіге қоса жүктеп.
Әлбетте, мұның бәрінде де Ресей ресурстары түгелдей дерлік өздерінің соғысты қолдаушы путиншіл z-әншілерін қызғыштай қорғап жатыр.
Бірақ Өзбекстанның өз таблоидтарында үн жоқ. Бұл оқиғаны жарыққа шығарып, талқылап жатқан біреуі көрінбейді.
Ирина Дубцова – РФ диктаторы Владимир Путиннің Украинаға қарсы жасап жатқан агрессорлық соғысын ашықтан ашық қолдап жүрген өнер адамдарының бірі.
Мұның алдында сол үшін де қазақстандық көрермен қауым оның Қонаев (Қапшағай) қаласында өткелі тұрған концертін болдыртпай тастады.
Бір айта кетерлігі, өзінің шығармашылық қызметін негізінен Ресей жерінде атқарып келген Наргиз Закирова РФ-ның Украинаға қарсы соғысын батыл айыптағаны үшін былтыр елден шығарып жіберілген болатын. Оған 50 жылға дейін Ресейге келуге тыйым салынды.
