Димаш Құдайберген марқұм атасына арналған жазба қалдырды

АСТАНА. 18 маусым. Әлемдік деңгейдегі әнші Димаш Құдайберген жақында дүниеден өткен атасына арналған жазбасын жариялады. Бұл туралы Halyq Uni дерегіне сүйенген rast.kz хабарлайды.

Димаш жазбасын әлеуметтік желіде қалдырды.

«Рахмет, папа! Маған берген қанаттарың үшін, маған көкке қалай көтеріліп, көкжиегімді кеңейтуді үйреткенің үшін, 100 мектеп бере алмайтын рухани тәлімің үшін… Саған деген алғысымды сөзбен жеткізе алмаспын. Айтқандарымнан айтып, үлгермегендерім көп. Қош бол, әкетай! Мәңгі жүректесің! Жаның жұмақтан орын тапсын. Сенің кенжетайың.

Барлық көңіл айтып жатқан ағайындарға, Алла разы болсын! Отбасыларыңызда қайғы-мұң болмасын», – деп жазды әнші.

Еске сала кетейік, танымал әнші Димаш Құдайбергеннің атасы Құдайберген Айтбаев 13 маусымда 82 жасқа қараған шағында өмірден өткен еді.

Жақындары мен туған-туыстары, құда-жекжаттары мен тамыр-таныстары, жалпы жұртшылық  оның Астана қаласындағы «Әзірет Сұлтан» мешітінде өткен жаназасына қатысып, ақтық сапарға шығарып салды.