Түркістанда бұрын мектеп бітірген түлектер 6 отбасына баспана сыйлады
ТҮРКІСТАН. 5 маусым. Түркістан облысында бұдан 20 жыл бұрын мектеп бітірген түлектер 6 отбасына баспана сыйлады. Бұл туралы «ҚазАқпарат» ақпарына сілтеме жасаған rast.kz хабарлайды.
Облыста әр жылдары мектеп бітірген түлектердің әлеуметтік жағдайы төмен жерлестеріне үй салып беруді әдетке айналған. Сол игі іс биылғы жылы да өз жалғасын тапты.
Атап айтқанда, Түлкібас ауданына қарасты Абай атындағы және Б.Садықов мектебінің 20 жылдық түлектері мұқтаж отбасыға аудан орталығынан қорасы, моншасы, сарайы бар алты бөлмелі үй сыйлады. Сондай-ақ, жиналған 8 млн. 600 000 теңгеге үйдің ішіне қажетті жиһаз-техникалар сатып әперген. АлАрыс қаласындағы Байырқұм ауылында 20 жыл бұрын мектеп бітірген оқушылар өздері білім алған мектепке 3 млн теңгеге демеушілік жасаған. Бұл қаражатқа білім ұясындағы тозығы жеткен оқу үстелдері толығымен жаңартылды. Сонымен қатар, түлектер мектепке қоғам қайраткері, белгілі ақын Мұхтар Шахановты арнайы шақырып, рухани мазмұны мол кездесу ұйымдастырған.
Шардара ауданына қарасты Қоссейіт ауылдық округіндегі «Сырдария» жалпы орта мектебінің 2003 жылғы түлектері көпбалалы отбасыға үш бөлмелі тұрғын үй тарту етті. Бұдан бөлек, Ордабасы ауданындағы Төрткүл елдімекенінде тұратын 1985-1986 жылғы туған түлектер төрт баласы бар жалғызбасты анаға баспана салып берген.
Дүрегей дәстүр аясындағы ізгі іс Келес ауданына қарасты Ақтөбе ауылдық округінде де жалғасты. Мұнда да баспанасы жоқ бір отбасы үйлі болды. Бірлік ауылдық округіндегі №57 Ә.Жангелдин атындағы жалпы орта білім беретін мектептің 2003 жылғы түлектері аллея салып берді. Келеске қарасты Ақтөбе ауылдық округіндегі №40 Ғ.Мұратбаев атындағы жалпы орта мектебінің түлектері қоғам қайраткері Ғани Мұратбаевтың құрметіне ескерткіш орнатты.
