USD
ӨСКЕМЕН. 20 ақпан. Шығыс Қазақстан облысының әкімі Даниал Ахметов жиналған жұртшылықтың табанды талап-арыздарын мұқият тыңдап алғасын, Зайсандағы 42 Қытай азаматын елдеріне қайтаруға уәде берді. Бұл туралы Dalanews.kz хабарлады.
Облыс әкімі Зайсан ауданы тұрғындарының талабына құлақ асып, аудандағы қытай жұмысшылары еңбек ететін компанияға барды.
«Маған аздаған уақыт беріңіздер. Бұл – халықаралық қатынастың мәселесі. Қазір бұл жайында Мемлекет басшысымен сөйлесіп, шешім қабылдаймыз. Оларды (қытай азаматтарын айтады – ред.) қай уақытта Қытайға жөнелтерімізді анықтайтын боламыз. Барлық 42 адам үйіне қайтады», – деді ол.
Бірақ бұл 42 азамат Зайсанға қауіпті індет пайда болардан алдын келген екен.
Айта кететін жайт, бұған дейін әлеуметтік желіде «қауіпті індет жұқтырған Қытай азаматтары Зайсанға жеткізіліп, жергілікті ауруханаға жатқызылды» деген қауесет тараған. Мұны естіген шекарадағы «Сартерек» және «Айнабұлақ» ауылдарының тұрғындары көшеге шығып, жергілікті әкімдіктен мән-жайды түсіндіруді және шекараны жабуды талап еткен.
Облыс әкімдігіндегілер Қытайдан келгендерді жергілікті ауруханаға жатқызу жайлы жоспар болмағанын айтты.
Аймақ басшысы осы оқиғаға байланысты Күршім ауданына жоспарланған сапарын кейінге қалдырыпты. Ол мұның орнына шекарадағы ахуалға алаңдаған Зайсан ауданының тұрғындарымен кездесіп, шекараны бірде-бір шетелдіктің кесіп өтпейтініне сендірді.
«Қытаймен арадағы шекара жабық. Барлығыңызды сабырға шақырамын. Қытайдан келген бес адам – өз азаматымыз. Студент жастар. Біз оларды шекараны ашпай, шеттетіп жібергеніміз дұрыс болар ма еді? Олар бірден карантинге жабылады, өзгелерден оқшауланады», – деді Даниал Ахметов.
