АҚШ Ресейдің ядролық қаруға қатысты бопсасына жауап қайтарды
ВАШИНГТОН. 29 наурыз. АҚШ Мәскеудің ядролық бопсасына жауап ретінде бұл мәселе бойынша Ресейге мәлімет беріп тұрудан бас тартты. Бұл туралы шетел таблоидтарының ақпарына сүйенген rast.kz хабарлайды.
Ақ үй бұдан былай өзінің стратегиялық ядролық күштері жайлы мәліметтерін Кремльге жеткізіп, пікір алмасып тұруды тоқтататынын мәлімдеді. Бұған РФ-ның «Стратегиялық шабуыл қаруларын қысқарту туралы келісімшарттан» шығатыны турасындағы біржақты шешімі себеп болды.
The Washington Post газетінің жазуынша, Вашингтонның бұл шешімі алғашқы қадам ғана, Кремль бұдан кейін мұнан да басқа көптеген қарсы жауап шараларына тап келетін болады.
«Бұл – Ресейдің келісімшарт шеңберінен шығу жөніндегі шешіміне жауап ретінде біз қабылдап жатқан бірінші әрекет. Біздің мақсатымыз – Ресейді келісімшартты сақтауға қайта оралуға мәжбүр ету», – деді басылымға сұхбат беруші лауазымды тұлға.
Атап өту керек, АҚШ пен РФ «Стратегиялық шабуыл қаруларын қысқарту туралы келісімшартқа» 2010 жылы қол қойған болатын. Бұл құжат негізінде екі ел мамандарынан құралған инспекция Америка мен Ресейдің ядролық қару-жарақтары жайын тексеріп, ұдайы бақылауда ұстап тұруға тиіс болатын. Алайда 2020 жылы пандемия салдарынан тексеру жұмыстары басталмай жатыр тоқтап қалды.
Шын мәнінде Ресей ядролық арсеналының жағдайы қандай екенін әзірге ешкім ештеңе білмейді.
Ал биыл РФ президенті Владимир Путин келісімшарттан шығатындары туралы мәлімдеме жасады.
Бұдан бұрын хабарланғандай, Қытай лидері Щи Дзиңпиң Ресейге келіп, ядролық соғыс жайлы ойға да алып қажеті жоқ екенін айтып кеткеннен төрт күн кейін Путин өзінің ядролық қаруын 1 шілдеде Беларуське орналастыратынын айтып, жарияға жар салды.
Бұған Еуропа одағынан бастап, көптеген елдер басшылары қарсылық білдіріп жатыр.
