USD
УАШИНГТОН. 16 мамыр. АҚШ-тың ең ірі банкі соғыс аяқталғаннан кейін Украинаның «фин сценарийін» қайталайтынына болжам жасады. Бұл туралы The Moscow Times ақпарына сүйенген rast.kz хабарлайды.
Ресей-Украина соғысының ең ықтимал нәтижесі «фин сценарийі» болып шығады, оның ақырында Киев территориясының бір бөлігінен айырылып қалады, бірақ өзінің егемендігін, армиясын және Батыспен интеграциялық бағытын сақтайды. Мұндай болжамды АҚШ-тағы ең ірі JPMorgan Chase банкінің сарапшылары «Ukraine Engame: The path to an Imperfect Peace» атты баяндамасында білдіреді.
Олардың бағамдары бойынша, соғыстың нәтижесі келіссөздер үстелінде шешіледі, өйткені ұрыс алаңындағы жағдай тығырыққа тіреледі және алдыңғы шеп екі жылдан астам уақыт бойы бір орнынан қозғалған жоқ. «Ресеймен ымыраға келу шеңберінде, – деп санайды JPMorgan, – Украина бейтараптыққа, армияның күші мен мүмкіндіктерін шектеулерге келісуге мәжбүр болуы мүмкін. Мәскеу сосын бұл нәтижені, Украинаның толық берілуіне қол жеткізбесе де, өзінің жеңісі ретінде көрсете қояды».
Банк аналитиктері осыған орай Украина Финляндия өткенге ұқсас жолдан өтуі керек деп санайды. 1939 жылы КСРО-мен соғыстан кейін Суоми елі өз аумағының шамамен 10%-ын жоғалтты, соның ішінде Карелияны беріп қойды, сөйтіп, фин өзімен туыс карельдермен ажырап қалды, бірақ көршісімен тікелей соқтығысудан аулақ бола отырып, демократиялық жүйені, нарықтық экономиканы және Батыспен байланысты сақтап қалды. Киев үшін бұл одақ Жарғысының 5-бабы бойынша бастапқыда толық қорғаныссыз болса да, Еуропа одағымен, бәлкім, уақыт өте келе, НАТО-мен де біртіндеп интеграцияға келуге жол ашып береді.
Бұдан бір жыл бұрын JPMorgan сарапшылары Украина үшін базалық нұсқа «грузин сценарийі» болатынын, оның да Тбилиси сияқты біртіндеп Кремль орбитасына оралатынын болжаған еді. Мұның даму ықтималдығы сол кезде 50% деп бағаланды. Ал қазір банк болжамды айтарлықтай өзгертіп жіберіп отыр, яки «фин сценарийінің» ықтималдылығы 50%-ға баланса, «грузин сценарийі» 30%-ға дейін түсті, сондай-ақ «Израиль сценарийі» 10%, ал «Оңтүстік Корея» және «Беларусь» модельдері 5% пайызға бағаланады.
Банк сондай-ақ Батыстың қолдауының біртіндеп әлсірей беруі, тұрақсыздықтың ұзаққа созылуы және Украинада толқу пайда болуы оның еш капитуляцтясыз-ақ қайтадан Ресейдің құшағына айналып баруына апарып соқтыруы кәдік деген тұжырымды да ұсынады.
