Еуропарламент Путин үшін трибунал құру жайлы қарар қабылдады
СТРАСБУРГ. 19 қаңтар. Бүгін Еуропарламент Ресей президенті Владимир Путинге арналған трибуна құру жөніндегі тиісті қарарды мақұлдады. Бұл туралы «Степкор» хабарлады.
Еуропарламент депутаттары Владимир Путинді, Александр Лукашенконы және РФ мен Беларусьтің басқа да жоғары лауазымды басшыларын қылмыстық жауапқа тарту керек деп шешті. Олар 472 дауыспен осы мазмұнды қарарды қабылдады. Рас, бұған «қарсы» дауыс берген 19 депутат та табылды. Тағы 33 депутат «қалыс қалыпты».
Қарарда Ресей әскерлері украинның Буча, Ирпень, Мариуполь, Гостемел және басқа да қалаларында жасаған айуандық әрекеттер бұл соғысты олардың бір халықты қырғынға ұшырату мақсатында жүргізіп жатқанының куәсі болатыны атап көрсетілген. Сондықтан кінәлілерді жауапқа тартудың халықаралық әрекетін үйлестіру керектігі талап етіледі.
Еуропа депутаттары сондай-ақ трибунал тек Владимир Путин мен Ресей басшылығына ғана заң жүзінде баға берумен шектеліп қалмау керек, мұндай жазаға Александр Лукашенко мен оның Бедарусьтегі жандайшаптары тартылулары тиіс деп есептейді.
«Парламент осындай арнайы трибуналдың құрылуы ғана Ресей қоғамы сияқты халықаралық қауымдастыққа да РФ президенті Путин мен тұтастай алғанда Ресей басшылығының Украинаға қарсы қылмыстарының ауқымы мен салмағын пайымдай алуға мүмкіндік беретініне өте сенімді. Еуропа парламенті Батыстың енді Путиннің басшылығындағы Ресей Федерациясымен бұрынғы қалыпты қарым-қатынасқа қайтып келе алмайтынын да атап көрсетеді», – делінген Еуропарламент сайтында жарияланған хабарламада.
