USD
ДОХА. 10 желтоқсан. Бүгін кешке Катарда өтіп жатқан футболдан әлем чемпионатында тағы бір сенсация тіркелді: Марокко Португалияны ұтты. Бұл туралы rast.kz хабарлады.
Чемпионаттың 1/4 финалындағы бұл матч 1:0 есебімен африкалықтардың пайдасына шешілді. Ойындағы жалғыз голды 42-минутта Эл-Несири кезекті қарсы шабуыл кезінде баспен ұрып түсірді. Оның тура соққан добын дарбазашы Диого Кошта қайтара алмады.
Командалар мына құрамда алаңға шықты:
Марокко: Буну – Аттият, Эль Ямик, Саисс (Дари, 58), Хакими – Амалла (Кеддира, 65), Амрабат, Унахи – Буфаль (Абухляль, 81), Эн-Несири (Банун, 65), Зиеш (Жабран, 81)
Португалия: Кошта – Геррейру (Канселу, 51), Пепе, Диаш, Далот (Орта, 79) – Отавио (Витинья, 69), Невеш (Роналду, 52), Б. Силва – Фелиш, Рамуш (Леау, 69), Фернандеш.
Марокколықтар осы жеңісі арқылы Африка құрлығынан әлем чемпионатының жартылай финалына бұрын-соңды шыққан ең алғашқы құрама болып отыр.
Кездесуде португал форварды Криштиану Роналду құрама дәргейінде өзінің 196-шы матчын өткізді. Осы арқылы тарихи рекордты жаңартуға жақындады. Қазір ол бұл көрсеткіш жөнінен Кувейт құрамасының ойыншысы Бадер аль-Мутавамен теңесті.
Еске сала кетейік, Марокко құрамасы бұған дейін, 1/8 финалдық матчта Испания құрамасымен 0:0 есебімен тең ойнап, матчтан кейінгі пенальтилер сериясында 3:0 есебімен жеңіске жеткен еді. Ал Португалия сол жолы Швейцария құрамасын 6:1 етіп еңсіретіп жеңген болатын.
Тағы бір айта кететін жайт, Марокко және Португалия құрамалары бұған дейін әлем чемпионаттарында екі рет кездескен. Оның біріншісі 1986 жылы өтіп, африкалықтар іріктеу тобында қарсыластарын 3:1 есебімен ұтып кеткен. Ал 2018 жылы орын алған екінші ұшырасуда еуропалықтар топтық сайыста бәсекелестерін 1:0 етіп тізе бүктірген.
Енді Марокко құрамасы бүгін түнде ойналатын Англия – Франция командаларының қай жеңгенімен жартылай финалда күш сынасады.
