Қазақстан РФ мемлекеттік насихаттық телеарналарын бұғаттауы мүмкін
АСТАНА. 7 желтоқсан. Қазақстан билігі ұлттық қауіпсіздік үшін Ресейдің мемлекеттік насихатын таратушы телеарналарды бұғаттау жоспары барын айтты. Бұл туралы The Moskow News хабарлады.
«Қазақстан билігі ресейлік насихаттық телеарналарды бұғаттау мәселесін қарастырады. Алайда оны тек азаматтардың өтініштері негізінде қабылданған сот үкімі ғана шешіп бере алады», – деп мәлімдеді Ақпарат және қоғамдық келісім министрі Дархан Қыдырәлі.
«Тұтастай алғанда, біздің күн тәртібіндегі басты мәселеміз – қазақстандықтардың дұрыс ақпарат алуы. Сондықтан бұл мәселені қарайтын боламыз. Бірақ министрлік ретінде онымен өзіміз күресе алмаймыз», – деді министр.
Ресей насихатшылары бұған дейін бірнеше рет өздерінің біздің елге қатысты білдірген комментарийлері үшін Қазақстан билігінің сынына ұшыраған болатын. Мысалы, сәуір айында тележүргізуші Тигран Кеосян Астананы Украинадағы соғысқа байланысты Жеңіс күні парадын өткізуден бас тартқаны үшін шала бүлініп, біраз жынын төгіп еді. «Қазақтар! Бауырлар! Осы ма сендердің алғыстарың? Жігіттер, сендер шынымен Ресей бір жаққа ұшып кетеді, Марсқа кетіп қалады деп ойладыңдар ма? Немесе өздерің кетпекшісіңдер ме? Украинаға мұқият қараңдар! Мықтап ойланыңдар!», – деп сарнады ол.
Қазақстан президенті Қасым-Жомарт Тоқаев бұл мәлімдемені орынсыз деп атады.
Қараша айында Астана Кремльден саясаттанушы Дмитрий Дробницкийдің «Россия 1» мемлекеттік телеарнасынан Ресейдің «келесі проблемасы» Қазақстан болатыны туралы айтқанына байланысты түсініктеме сұрады.
«Онда да нацистік үдерістер басталуы мүмкін. Онда орыстар да көп, ондағы территория да… Кешіріңіздер, Семей сонда, біздің «Росатом» үшін алынатын ядролық отын да сонда», – деді ол.
Қазақстан сенаторы Мұхтар Құл-Мұхаммед сондай-ақ бұрын «Алматыны бомбаның астына алуды» ұсынған тележүргізуші Владимир Соловьевтің енді өз шоуына қатысушыларды осындай пиғылға айдап салып отырғаны үшін айыптады.
Суретте: Ресей пропагандистері, ерлі-зайыпты армяндар Тигран Кеосян мен Маргарита Симоньян.
