Ақ үй енді Ресейге терроризмнің демеушісі ретінде санкция салуы мүмкін
ВАШИНГТОН. 15 қыркүйек. АҚШ Ақ үйі Конгреспен бірге Ресейге терроризмге дем беруші ел ретінде санкция енгізу мәселесін талқылағалы жатыр. Бұл туралы «Украинская правда» хабарлады.
АҚШ президенті Джо Байденнің әкімгершілігі Конгреспен Ресейге қарсы терроризмнің демеуші мемлекетіне тән шектеу шараларын қолдану мүмкіндігін талқылайды. Мұны АҚШ мемлекеттік департаментінің өкілі Нед Прайс сәрсенбі күні өткен брифингте мәлімдеді.
«Біз қабылдап қойған қадамдар, Конгреспен бірге талқылап, шешім шығаруға жеткізіліп қойылған қадамдар бар, олар терроризмге демеуші мемлекеттер туралы заңда қарастырылған шараларды қамтиды», – деп атап өтті ол.
Мемлекеттік департамент өкілі Ресейді терроризмнің демеушісі деп жариялаған жағдайда оның зардаптары Вашингтонның әріптестеріне тиіп кететінін, сондай-ақ Украинаға гуманитарлық көмек жеткізіп тұруды қиындататынын айтты.
«Біздің пікірімізше, Ресей армиясы мен басшылығын жауапқа тарту үшін қолдануға болатын бұдан да нақты бағыттар бар», – деді ол.
Бұдан бұрын Джо Байден Ресейді терроризмге дем беруші мемлекет деп тануды қолдамайтынын айтқан болатын.
Ал осыдан бір күн ғана алдын, сәрсенбіде АҚШ сенаторлары Ричард Блюменталь (Демократиялық партия) мен Линдси Грэхэм (Республикалық партия) Ресейді терроризмнің демеуші мемлекеті деп тануға шақырған болатын.
