Автобус апатына айыптылар анықталды
ҚЫЗЫЛОРДА. 21 қаңтар. Қызылорда облысының аумағында орын алып, 11 адамның өмірін жұлып әкеткен автобус апатына айыптылар анықталды. Бұл туралы Kyzylorda-news.kz хабарлады.
Енді осы жол апатының жасалуына себепші болған кінәлілер қылмыстық жауапкершілікке тартылады.
Естеріңізге сала кетейік, аталмыш оқиға 2019 жылдың 3 желтоқсанында орын алды. Соның салдарынан «Саутс-Ойл» компаниясының 10 қызметкері мен 1 жүргізуші қаза тапты.
«Аталмыш оқиға бойынша ҚР Қылмыстық кодексінің 345-бабының 4-бөлігі бойынша тергеу амалдары басталды. Онда абайсызда екi немесе одан да көп адамның өлiмiне әкеп соққан іс-әрекет жағдайы көрсетілген», – деп мәлімдеді Қызылорда облыстық прокуратурасының өкілі.
Ведомствоның мәліметінше, өз міндетіне салғырт қарағаны үшін «Саутс-Ойлдың» вахталық жұмысшыларын тасымалдаумен айналысқан компания директоры қылмыстық жауапкершілікке тартылады. Сондай-ақ, «Саутс-Ойл» ЖШС вахталық ауысым бастығы мен «Автотранс» ЖШС директорына қылмыстық іс қозғалды. Олар синоптиктердің дабылды ескертуін қаперге алмаған. Автобустың техникалық жағдайына мән бермеген. Оған қоса, жүргізушіде жолдама парағының жоқтығына қарамастан көктайғақта жолға шығуына рұқсат берген болып шықты.
