Путин соғыс ушықса, өзі тығылатын бункер дайындап жатыр
МӘСКЕУ. 21 наурыз. Ресей президенті Владимир Путин Украинадағы агрессия ядролық соғысқа айналып кетсе, өзі тығылатын бункер дайындап қойды. Бұл туралы «Обозреватель» хабарлады.
«Ресей басшылығы ядролық соғыс бола қалған жағдайда керек болады деген пиғылмен елдің шығыс жағынан жерасты қалашығын жаңаша дайындауға кірісіп кетті. Мұны 17 наурыз күні сол жаққа қарай бірнеше бағытта үкіметтік рейстердің жасалғаны да анық аңғартады», – делінген хабарламада.
Бұл жерлерде Кеңес Одағы кезінде бірнеше ай автономиялық режимде тұрып, өмір сүруге болатын жерасты басқару орталықтары жасалып қойылған екен.
Бұдан алдын Әлеуметтік-экономикалық институт директоры Илья Несходовский өзінің мәнбесіне сілтеме жасай отырып, Путин өзіне қастандық жасалуынан қатты қорқатынын, сондықтан Кремльде көп отырмауға тырысатынын мәлімдеді. Ол Украинаға соғыс ашқаннан кейін арнайы қорғанысқа бейімделген бункерге көшіп алған.
Соңғы кездері Владимир Путиннің Башқұрт республикасының Белая река ауданы жеріндегі Орал тауларының түстік баурайында жатқан Ямантау деген шоқының астына орналасқан бункер-қалашықта тұрып жатқаны да жиі айтылып жүр. Жақында әскери құрылысшылар қысқа мерзім ішінде бұл құпия кешенді қайта жасақтап, жаңғыртып шыққан. Бұл жерден сыртқа қарай шығатын бірнеше тар енді теміржол желісі мен автомагистраль да салынып қойылыпты. Мұнда жылдап өмір сүре беруге болады. Сол уақыттарға дейін жететін азық-түлік пен суға дейін жеткізілген екен.
Әлеуметтік желіде осы бункердің суреттері, онда отырған Путиннің рәсімі жарияланды.
Жамантау осылайша Путиннің жанын сақтап қалатын жақсы мекенге айналғалы тұр.
Жалпы, Ресей территориясында кемі мұндай 5-6 бункер бар екені айтылады.
Ямантаудың картасы
