Азапталған Талдықорған (видео)

Талдықорғанға барып қайттық. Баласы дүрбелеңнен соң ұсталып, тергеу кезінде азапталған ата-аналармен сөйлестік.

Әбден күйініп, көкірегін ыза мен ашу кернеген әкені, прокурордың аяғына жығылып, «Баламды босатшы» деп өкіріп жылаған шешені жайбарақат тыңдау мүмкін болмады.

Бір әке сөйледі. 9-сыныпта оқитын 15 жасар баласын полиция ұстап әкетіп, тергеу кезінде әбден азаптаған. Төрт тісін жұламыз деп, қысқышпен босатып тастапты. Арқасына үтік басқан. Бүйрегінен ұрған. Мұны баласы кездесу кезінде айтып беріпті. Үтіктің ізін өз көзімен көрген. «Атамекенінде болсын деп Қытайдан сүйреп әкелген баламды аяқ асты етіп отыр» деп ызадан жылай жаздады. Оның баласына қару ұрлады деп айып таққан.

16 жастағы Берікболдың үстінен де қару жымқыру бабымен іс қозғалған. Әкесімен кездесу кезінде таяқ жегені туралы айтпапты. Адвокаты арқылы «Ұрды. Бүйректен, тағы басқа жерлерден ұрды. Үтік басты» депті. Сырттан дәрігер кіргізіп, бүйрегін қаратуға мекеме рұқсат етпеген.

Бір апаның екі баласы да СИЗО-да қамауда отыр. Бірі кәмелет жасына толмаған. «Екеуі де кездесу кезінде мамалап жылады» дейді. Олардың да санына үтік басыпты. Тергеушілер «айтқанымызды істемесең, әке-шешеңді барып атып тастаймыз» деп қорқытқан көрінеді.

Көбі баласының өзгеріп кеткенін айтады. «Көзқарасы, сөйлеуі басқаша. Әбден қорқып қалған, жалтақтап отырады, сындырып тастаған» дейді.

Аян ҚАЛМҰРАТ

Facebook