USD
МӘСКЕУ. 16 қаңтар. Ресейдің ЛДРП партиясының жетекшісі Владимир Жириновский Қазақстанның бұрынғы президенті Нұрсұлтан Назарбаевты әлдеқашан бақилық болып кеткен деп есептейді. Бұл туралы «Комсомольская правда» хабарлады.
Владимир Жириновский – бұрынғы қазақстандық, Алматы қаласының тумасы. Ол жоғарыдағы болжамын «Комсомольская правда» газетінің радиосы эфирінде айтты.
«Қазақстанның экс-президенті Нұрсұлтан Назарбаев әлдеқашан қайтыс болған», – деді ол өзінің сөзінде. Саясаткер ұлттық қауіпсіздік комитеті төрағасы да қолға түскенін алға тартып, республиканың бұрынғы басшысының бір жерде тығылып жүруі мүмкін екенін жоққа шығарды.
«Мен оны баяғыда өліп қалды деп ойлаймын. Баяғыда өліп, жерленіп қойылған. Мұсылмандар өлген күні жерленеді. Тірі болса ол, қалайша тып-тыныш тығылып жата береді? Мұның реті келмейді. Оның үстіне, қауіпсіздік кеңесінің төрағасы бірден қамауға алынды ғой», – деп мәлімдеді Жириновский тілшінің Назарбаевтың тірі-өлі екені жөніндегі сауалына жауап беріп тұрып.
Саясаткер бүкіл халық Назарбаевқа қарсы көтерілгендіктен, одан құтылулары да мүмкін деген топшы білдірді. Бұған мысал ретінде Ауғанстанның Халық-демократиялық партиясының бас хатшысы Нұр Мохаммад Таракидің 1979 жылы қысқа мерзімде тақтан тайдырылып, құпия жойылып жіберілгенін келтірді.
«Ол жақ – Шығыс. Онда – өлім де жедел», – дегенді қосты ЛДРП жетекшісі.
Назарбаев жаңа жылда жаппай қарсылық қозғалысы басталғалы бері халық алдында көрінген жоқ. Бұл ол туралы алуан түрлі қауесеттердің тууына себеп болып жатыр.
Бұдан бөлек, бұрынғы президенттің Қытайда, Қырғызстанда немесе БАӘ-де жүргені жайында да версиялар бар. Сол сияқты оның қайтыс болғаны, ұрланып әкетілгені немесе қапаста ұсталып отырғаны туралы да қауесеттер айтылып жүр.
Бұдан алдын «Эксперт» Нұрсұлтан Назарбаевтың Астанада екенін хабарлаған еді. Мұны басылым бұрынғы президенттің баспасөз хатшысы Айдос Үкібайдың Twitter әлеуметтік желісіне орналастырған жазбасына сүйеніп баяндады. Ол өзінің жазбасында Нұрсұлтан Назарбаевтың Қасым-Жомарт Тоқаевпен тікелей байланыста екенін, президенттің ақылдасып тұратынын атап өткен-ді. Ал бұдан кейін бұрынғы президенттің Қауіпсіздік кеңесі төрағасы лауазымын да өзі бергенін жазды. Сонымен бірге бұл мәселеге байланысты жалған ақпар таратпау жөнінде өтінді. Алайда, президенттің баспасөз хатшысы Берік Уәли бұл мәлімдемені тұспалдап жоққа шығарған хабарлама жазып, сұхбат берді. Ол президенттің барлық мәселені мемлекет басшысы ретінде жеке-дара шешіп келе жатқанын, ешқандай кеңесшіге арқа сүйеп отырмағанын, сондай-ақ Қауіпсіздік кеңсесін де елдің бірінші басшысы ретінде өзі қолына алғанын мәлімдеді.
