USD
АСТАНА. 13 қаңтар. Жамбыл облысында орын алған жарылыс кезінде қаза тапқан Мейіржан Аймановқа «Халық қаһарманы» атағы берілді. Бұл туралы «Азаттық рухы» хабарлады.
Оқиға 2021 жылдың 21 тамызында Жамбыл облысы Байзақ ауданындағы әскери бөлімде болған еді. Сол жарылыс кезінде өрт сөндіру және авариялық-құтқару жұмыстары қызметі бастығының орынбасары Мейіржан Айманов ерлікпен қаза тапты.
«Жамбыл облысы Төтенше жағдайлар департаменті өрт сөндіру және авариялық-құтқару жұмыстары қызметі бастығының орынбасары Мейіржан Көпбосынұлына туған еліне сіңірген аса үздік еңбегі, қызметтік борышын атқару кезінде көрсеткен батылдығы мен жанқиярлығы үшін Қазақстан Президентінің 2021 жылғы 29 тамыздағы Жарлығымен, қайтыс болғаннан кейін айрықша ерекшелік белгісі – «Алтын жұлдыз» және «Отан» ордені тапсырыла отырып, «Халық қаһарманы» атағы берілді», – делінген Тараз қалалық әкімдігінің хабарламасында.
Сонымен қатар, Мемлекет басшысының тапсырмасына сәйкес, Тараз қаласының әкімі Ержан Жылқыбаев марқұмның жары Қарлығаш Аймановаға 3 бөлмелі пәтердің кілтін тапсырды.
Есіл ердің артында әйелі мен 5 баласы қалды.
