USD
Не болды сізге Абаев? Не отырыс мынау?! Түріңізді жақсылап қараңызшы! Не түр мынау, үңгірден шыққаннан бетер үрпі-түрпі, астына жіберіп қойған баладай? Біздің елдің 90 пайызы орыс тілінде сөйлейді деген не сасқандық?
Не топастық? Миы бар адам мақтанатын нәрсе ме осы?! Француздардың біздің елдің 90 пайызы итальянша сөйлейді деп, не болмаса итальяндардың біздің халықтың 90 пайызы французша сөйлейді деп мақтанғанын естіп-көрдіңіз бе? Сіздің мына түріңізден кейін, мына сөзіңізден кейін ұяттан өртенгеннен өмір бойы үңгірде жасырынып отыратын шығармыз…
Міне, қараңыздар, біздің ел басқарып жүрген адамдарымыздың пошымын! Өресінің түрін қараңыздар! «Аюға намаз үйреткен таяқ» дейді қазақ. Бірақ қанша жерден таяқтасаң да, оның еш бет-әлпеті өзгермейді, сол хайуан кейпінде қалады, өйткені, табиғаты сол. Адамның өресі де сол сияқты, ол да адамға табиғатпен беріледі. Табиғатында өресі төмен адам қандай білімді болса да, өресінің болмысы өзгеруі қиын… Сондықтан Абаев мырза, сіздің Нидерланд еліндегі Лейден университетінде алған біліміңіздің құны көк тиын. Тек осы білімнің құнын кім төлегені ғана қызық маған. Қазақ халқының қалтасынан төленген қаржы болса қайтарыңыз қазынасына. «Күшік асырап, ит еттім, ол өзімді қапты» болып жүрмесін. Сонда да болса, менің (халықтың) ит-аяғымнан ас ішіп отырып, өзімізді қапқаныңыз қызық болды.
Қазір әлемде нағыз ақпараттық соғыстың қызып тұрған кезі… Сол соғыста сіз бізді сатып кеттіңіз. Соғыс басталмай тұрып жеңіле салатын сіз сияқты қорқаулар бастаған елде ешнәрсе дамуы мүмкін емес. Токио Олимпиадасындағы жеңіліс соның көрінісі. 2019 жылдан бері Қазақ күресі ұлттық федерациясын басқарады екенсіз, айналайын Абаев-ау, «күрес сенің не теңің, жылтырайды к…» дейін десем, ұятым жібермей тұр. Ал бірақ сіздер ұялмайсыздар! Ар да, ұят та, намыс та жоқ! Путиннің «пещерный национализм» деген сөзін жаттап алып, қай елдің президентіне қызмет жасап жүргеніңізді шатастырып алған секілдісіз… Бірақ дәл осы сөзіңіз 30 жылда өз ұлтын «үңгірден» алып шыға алмаған дарынсыз, қабілетсіз, түкке жарамсыз, бейшара басшы болғандарыңызды мойындаудың бұлтартпас дәлелі болды.
Жетер енді, осымен орныңызды «үңгірдегі ұлтшылдарға» босатқаныңыз дұрыс болар! Олардың елді сізден артық басқаратынына кепілдік бере аламын.
Ақмарал ҚАМБАРҚЫЗЫ
Facebook парақшасынан сол қалпы алынды.
