Австралияның Брисбені 2032 жылғы Олимпиаданы қабылдайды
ТОКИО. 21 шілде. Австралияның Брисбен қаласы 2032 жылы өтетін XXXV жазғы Олимпиялық ойындардың қожайыны болып бекітілді. Бұл туралы БелТА хабарлады.
Мұндай шешімді бүгін Токиода өткен Халықаралық олимпиялық комитеттің 138-сессиясы қабылдады.
Үстіміздегі жылғы ақпан айында ХОК атқару комитеті Австралияның Квисленд штатының орталығы Брисбен қаласын Олимпиада-2032 турнирін өткізетін басты үміткер деп белгілеген еді.
2019 жылғы маусымда ХОК Ойындар орталығын таңдаудағы бұрынғы үйреншікті процедураның бірі – жарыс өтуге жеті жыл қалғанда анықтау талабынан бас тартқан болатын. Сонымен бірге жарыстар түгелдей олимпиада астанасында өтуге тиіс деген тармақты да алып тастады.
Бұдан былай қалалар Олимпиада өткізу жөнінде өздерінің қаржылай мүмкіндіктерін ортаға салып, бақ таластырып та жатпайды. Енді оны арнайы комиссия өзі анықтайды.
Бұл жолы 2032 жылғы Олимпиаданы өткізуге Брисбеннен бөлек Доха, Будапешт, немістің Рейн-Рур, қытайдың Чэнду және Чунцин қалалары үмітті болды.
Осымен, Австралия тарихта үшінші мәрте Олимпиаданың егесі болғалы тұр. Бұған дейін бұл құрлық-мемлекеттің Мельбурн қаласында 1956 жылы, Сидней қаласында 2000 жылы Ойындар өткізілгені белгілі.
Еске сала кетейік, 2024 жылғы жазғы Олимпиялық ойындар Париж (Франция), 2028 жылғы жазғы Олимпиялық ойындар Лос-Анджелес (АҚШ) қалаларында өтеді.
