Түркістаннан Ташкентке бірінші әуе рейсі жасалды

ТАШКЕНТ. 22 маусым. Кеше Ташкенттің халықаралық аэропорты Түркістан қаласынан келген бірінші ұшақ рейсін қабылдады. Бұл туралы CentralAsia.uz хабарлады.

Қазақстандық FlyArystan лоукостері Түркістаннан 180 жолаушыны жеткізді.

«Өзбекстан хава йуллары» компаниясының хабарлауынша, Түркістан – Ташкент – Түркістан авиарейсі дүйсенбі және бейсенбі күндері «Airbus A320» ұшағымен жүзеге асырылады. Бір тарапқа сатылатын ең арзан билет 870 000 сум (34 210 теңге) тұрады. Ұшу уақыты 50 минутқа созылады.

Биылғы 2 маусымда Өзбекстан көлік министрлігі Самарқанд пен Алматы, сондай-ақ Ташкент пен Түркістан арасында тұрақты рейстер ашылатынын хабарлаған еді.

Одан алдын, наурыз айында Қазақстанның SCAT компаниясының Ақтау – Үргеніш – Ақтау арасында тұрақты рейс ашылғаны баяндалған болатын.