USD
УАШИНГТОН. 19 наурыз. Ресей мен Украина арасында жүріп жатқан соғыстағы атысты тоқтату жөніндегі келіссөз 23 наурызда Жидда қаласында жалғасады. Бұл туралы DW ақпарына сүйенген rast.kz хабарлайды.
Мұның жайын 18 наурыз, сейсенбі күні АҚШ президентінің арнайы өкілі Стивен Уиткофф Fox News телеарнасында қысқаша әңгімелеп берді.
Сол күні ертерек АҚШ президенті Дональд Трамп пен Ресей президенті Владимир Путин телефон арқылы сөйлесті. Осылайша Трамп қазіргі президенттік мерзімі басталғаннан бері екінші рет Путинмен тіл қатысты. «Уиткофф осы әңгіменің нәтижелеріне түсініктеме бере отырып, келіссөздер үдерісіндегі «белгілі бір серпілістерді» атап өтті», деп хабарлайды dpa агенттігі. «Мен президент Путинге өз елін түпкілікті бітімгершілік келісімге жақындату үшін осы үндеуде жасаған барлық істері үшін алғыс айтқым келеді», – деп келтіреді агенттік АҚШ президенті арнайы өкілінің сөзін.
Ақ үй басшысының өзі Владимир Путинмен телефон арқылы сөйлескеннен кейін Truth Social әлеуметтік желісінде былай деп жазды: «Біз атысты толық тоқтатуды тезірек жүзеге асыру, мұның ақырында Ресей мен Украина арасындағы сұмдық соғысты тоқтату жолында жұмыс істейтінімізді түсініп, барлық энергетика және инфрақұрылым нысандарын атқылауды жедел тоқтату жөнінде келісімге келдік».
Өз кезегінде Путин Трамптың Ресей мен Украинаның энергетикалық инфрақұрылым нысандарына 30 күн бойы соққы беруден өзара бас тарту идеясын қолдады және Кремль хабарлағандай, Ресей әскерлеріне осыған орай тиісті бұйрық беріпті-міс.
Сонымен бірге, Кремльдің қожайыны, ТАСС агенттігінің хабарлауынша, екі президенттің сөздерінде қозғалған «бірқатар маңызды тұстарды» атап өтіпті. Бұлар бүкіл шекараның түйісер бойында атыстың тоқтағанына тиімді бақылау жасап тұруды қамтамасыз ету, Украинаның мәжбүрлі мобилизация жасауын және осы күндері Украина армиясын қаруландыруды тоқтату жайттары болса керек. Осылайша, Кремль өзінің Киевпен 30 күндік бітімге келуге толық дайын екенін мәлімдей қойған жоқ.
«Украина энергетикалық инфрақұрылымға шабуылды тоқтату туралы ұсынысты қолдайды», деді Володимир Зеленський Киевте Трамптың Путинмен сөйлесуінен кейін өткізген баспасөз мәслихатында. «Ресей мен Украина АҚШ-тың арағайындығымен энергетикалық инфрақұрылымға шабуыл жасамауға келісе алады. Біздің тарапымыз мұны қолдайды. Бірақ Ресей біздің энергетикалық секторымызға шабуыл жасап жатса, біздің үнсіз қалуымыз мүмкін емес. Біз жауап қайтарамыз» деді ол бітімгершілікті «атысты күмәнсіз тоқтатудан» бастаудан керек екенін еске салып.
Германия канцлері Олаф Шольц та Мәскеу мен Уашингтон арасындағы телефон арқылы сөйлесу нәтижелеріне қатысты пікір білдірді. Ол энергетикалық нысандарға шабуылдауды тоқтату туралы үндеудің «жақсы бастама» екенін айтты. Сонымен бірге, Шольц Украинаның қатысуынсыз бейбітшілікке қол жеткізу туралы келісімге келудің мүмкін еместігін тағы қайталап атап өтті.
