USD
УАШИНГТОН. 28 мамыр. АҚШ президенті Дональд Трамп Армения премьер-министрі Никол Пашинянды жақтайтынын, іс жүзінде оны сайлауда қолдап шығатынын баяндаған сөз жазды. Бұл туралы Minval.az ақпарына сүйенген rast.kz хабарлайды.
«Армения премьер-министрі Никол Пашинян – ұлы дос және көшбасшы – өз елін күшті, бай және өте қауіпсіз етеді», – деп сөз боратты Трамп.
Америкалық көшбасшының айтуынша, Пашинян өзінің Оңтүстік Кавказға қатысты «бейбітшілік пен өркендеу» туралы көзқарасын «толығымен бөліседі». Трамп сонымен қатар АҚШ пен Армения жақын арада аймақты өзгертіп, америкалық энергетикалық компанияларға Орталық Азиядан АҚШ-қа жол ашуы керек деп мәлімделген «Трамп бағыты» жобасын жүзеге асыра бастайды дегенді айтты.
«Никол менің Армения мен бүкіл Оңтүстік Кавказ аймағы үшін бейбітшілік пен өркендеу жөніндегі көзқарасымды толығымен бөліседі», – деді Америка президенті. Ол жақында АҚШ мемлекеттік хатшысы Марко Рубионың Арменияға жасаған сапарын және қол жеткізілген бірқатар келісімдерді, соның ішінде транзиттік дәліздің бірлескен жобасы туралы келісімдер туралы еске салды. Бұл жоба «Оңтүстік Кавказды жаңғыртады» және АҚШ энергетикалық компанияларына Орталық Азиядан Америкаға дейінгі бағыттарға қол жеткізуге көмектеседі», деп жазды Трамп.
«Никол менің толық және сөзсіз қолдауымды 2026 жылдың 7 маусымында қайта сайлауда алады», – деп атап өтті Трамп.
Үндеу соңында АҚШ президенті өзінің әйгілі MAGA ұранын қайталап: «Арменияны қайтадан ұлы етейік», – деп жазды.
Пашинянның өзі артынша Трамптың жарияланымына жедел жауап берді. Армян премьер-министрі АҚШ президентіне «аймақтағы бейбітшілік пен әл-ауқатты қамтамасыз етудегі маңызды қадам» үшін алғыс айтты және посттың өзін смайликтермен безендіріп қойды.
Бір айта кетерлігі, Дональд Трамп биылғы сәуір айында Венгрияда өткен парламент сайлауының алдында да осындай үндеу жариялап, венгрлерді премьер-министр Виктор Орбанның қайта сайлануына дауыс беруге шақырған болатын. Бірақ оның қолдаған адамы 16 жылдық өтілінен соң өзінің басты қарсыласы, «Тис партиясының жетекшісі Питер Мадьярдан жеңіліп қалған.
