USD
УАШИНГТОН. 30 қазан. АҚШ президенті Дональд Трамп Пентагонға ядролық қаруларды сынақтан өткізуді шұғыл қайта жалғастыруға пәрмен берді. Бұл туралы DW ақпарына сүйенген rast.kz хабарлайды.
Алайда Трамп мұнда толық көлемді жарылыстарды, жеткізу құралдарын сынауды немесе сыни сынақтарды меңзеді ме, ол жағы белгісіз. Негізі, АҚШ 1992 жылдан бері ешқандай жарылыстар жасап көрген емес.
Дональд Трамп Қорғаныс министрлігіне ядролық қаруды сынауды қайта бастауды тапсырғанын жариялады. «Басқа елдер сынақ бағдарламаларын жүргізген кезде, мен Қорғаныс министрлігіне ядролық қаруымызды тең негізде сынауды бастауды тапсырдым. Бұл процесс енді дереу қолға алынады», – деп жазды АҚШ президенті 30 қазан күні түнде TruthSocial әлеуметтік медиа платформасында.
Трамптың айтуынша, қазіргі уақытта АҚШ-та, «басқа елдерге қарағанда, ядролық қарудың саны көптеу». «Ресей – екінші, Қытай – үшінші орында. Бірақ олар бес жыл ішінде бізді қуып жетеді», – дегенді қосты сосын ол.
Ресей мен АҚШ-та сақталған ядролық оқтұмсықтардың саны туралы жария қолжетімді деректер әртүрлі, бірақ жалпы алғанда, олардың қоры шамамен бірдей. Сонымен қатар, ядролық арсеналдарды бағалау кезінде тек оқтұмсықтардың мөлшері ғана емес, сонымен қатар жеткізу құралдарының саны да ескеріледі.
Дональд Трамптың толық ауқымды ядролық жарылыстар, жеткізу құралдарын сынау немесе оқтұмсықтарды сынайтын, бірақ оларды жармайтын сыни сынақтар туралы айтқаны белгісіз.
Құрама Штаттар 1992 жылдан бері толық ауқымды ядролық қару сынағын өткізген жоқ. Уашингтон 1996 жылғы Ядролық сынақтарға жаппай тыйым салу туралы шартқа (ЯСТШ) қол қойды, бірақ оны ратификацияламады. Содан бері Невада сынақ полигонында сыни сынақтардан өткен жер асты ядролық сынақтарын жүргізді.
Мәскеу соңғы ядролық сынағын 1990 жылы, Кеңес Одағы әлі болған кезде жасады. Ресей ЯСТШШ-ға қол қойып, оны ратификациялады, бірақ 2023 жылы қолын қайтарып алды. Бұған дейін Құрама Штаттар Ресейді ядролық сынақтарға қойылған мораторийдің бұзылғаны үшін айыптаған болатын.
Трамптың бұлайша аяқ астынан қаһарына мінуіне Кремль диктаторының Украинаға соғыс ашқалы бері ядролық қаруды қолданатынын айтып, әрдайым қоқан-лоққы жасап келе жатқаны басты себеп болса керек.
Соңғы күндері Владимир Путин бұған қосы шексіз қашықтыққа ұшатын «Буревестник» ядролық қуатты қанатты зымыранын, содан кейін «Посейдон» ядролық қуатты су асты дронын сынақтан өткізгенін мәлімдеген еді. Бірақ Ресей ешқандай ядролық қару сынақтарын жасай қойған жоқ.
