USD
Ұстаздық – жер бетіндегі ең қасиетті де жауапты мамандық қана емес, ол адам жанын ізгілікке тәрбиелейтін, ұлттың болашағын қалайтын ұлы миссия. Сыр өңірінің киелі Шиелі топырағында, №270 Ғ. Мұхамеджанов атындағы мектепте еңбек етіп келе жатқан Айна Байдраманова – осы биік асуды біліммен, ұлттық құндылықтармен және заманауи ғылыммен шебер ұштастырып келе жатқан мәртебелі мұғалім. Осынау білікті маманның әрбір атқан таңы шәкірт жүрегіне жарық сыйлаумен, әрбір ісі қазақ тілі мен әдебиетінің кәусар бұлағынан нәр себумен өріліп келеді.
Тәжірибелі педагогтың ұстанымы: «Шәкірт бос құмыра емес, ол – тұтандыруды күтіп тұрған алау». Ол өз сабақтарында тек теориялық білім беріп қана қоймай, баланың ой-өрісін дамытып, қиялына қанат бітіреді. Қ.А. Яссауи атындағы Халықаралық қазақ-түрік университетінің түлегі ретінде болып табылатын кейіпкеріміз бүгінде «педагог-сарапшы» деңгейіне көтеріліп, 19 жылдық еңбек өтілінде сан мыңдаған өренді арман шыңына бағыттады. Оның зерттеп жүрген функционалдық сауаттылық мәселесі, атап айтқанда, PISA форматындағы мәтінмен жұмыс істеу дағдылары – бүгінгі білім беру кеңістігіндегі ең өзекті бағыттардың бірі. Бұл – ізденімпаз жанның үнемі уақыт көшінен қалмай, заманауи талаптарға сай еңбек ететінін айқындайды.
Білікті тәлімгердің шәкірттері – оның маңдай терінің жемісі мен мерейі. Соңғы жылдардағы жетістіктер осы сөзіміздің айқын дәлелі. Мәселен, еңбекқор ұстаздың баулуымен 11-сынып оқушысы Әлихан Зұлқарнайұлының облыстық «Дарын» орталығы ұйымдастырған «Жауқазын жүрек» әдеби алаңында «Жалынды жас публицист» номинациясын иеленуі — шебердің төзімі мен талғамының жемісі. Әлиханның Ғ. Мұхамеджановтың 100 жылдығына арналған эссе байқауындағы жеңісі де инновациялық мұғалімнің шәкірт бойындағы шығармашылық отты тұтандыра білгенін көрсетеді. Рухани ұстаз әр баланың қабілетін тани біледі. Тіпті, 5-сынып оқушылары Сымбат Ғалымқызы пен Нұрасыл Сәрсенбековтің республикалық пәндік олимпиадалар мен «Ақбота» зияткерлік сайыстарындағы жеңістері кейіпкеріміздің іргелі білім берудегі сұңғылалығын паш етеді.
Қазіргі заман мұғалімі – тек оқулықпен шектелмейтін, үнемі өзін дамытатын зерттеуші. Өнер мен сөз қадірін түсінген жан мектепшілік дебат сайыстарында бірінші орынды иеленіп, өз ойын ашық әрі көркем жеткізе білетін нағыз шешен екенін танытты. Оның Шиелі аудандық орталық кітапханасы тарапынан алған Алғыс хаты – жастарды кітап оқуға баулу жолындағы қажырлы еңбегінің айғағы. Б. Соқпақбаевтың 100 жылдығына арналған рухани кештердегі белсенділігі мен интеллектуалдық даму жолындағы үлесі оның нағыз ұлтжанды азамат екенін көрсетеді.
2025 жылы Шиелі аудандық білім бөлімінен алған «Құрмет грамотасы» мен еңбек кітапшасына жазылған алғыс – бұл кәсіби маманның көп жылғы қажырлы еңбегінің заңды өтеуі. Ол бүгінгі таңда ең өзекті тақырыптардың бірі – оқу сауаттылығын арттыру бойынша облыстық деңгейде тәжірибесімен бөлісіп, өзге әріптестеріне үлгі болуда. Бұл – жаңашыл көшбасшының, нағыз зиялы педагогтың шынайы бейнесі.
Айна апай – өз мамандығына берілген жан. Оның берген әрбір сабағында, ол тәрбиелеген әрбір шәкірттің жетістігінде үлкен жүректің жылуы мен аналық мейірімі жатыр. Шиелі ауданының білім беру саласында осындай білікті де парасатты жанның еңбек етуі – бүкіл аймақ үшін үлкен мақтаныш. Ұлттық рухты ұлықтап, заман ағымынан қалмай, шәкірттерін биік шыңдарға жетелеген бұл тұлғаның еңбегі әрқашан жана бермек. Өнегелі ұстаздың алар асуы әлі алда, өйткені оның бойындағы таусылмас қуат пен кәсіби шеберлік – еліміздің ертеңі үшін қызмет ететін басты қазына.
Жансая НҰРҚОЖА,
Қызылорда облысы,
Шиелі ауданы
