USD
ҚЫЗЫЛОРДА. 6 қыркүйек. Қызылордада 2001 жылы қайтыс болған азамат 2023 жылдан бері емханаға тіркеліп тұрған. Бұл туралы Bugin-media.kz ақпарына сілтеме жасаған rast.kz хабарлайды.
Мұның жайын жазған желі қолданушы жақында әкесінің медициналық деректерін тексеру барысында марқұмның «ДостарМедLine» клиникасына 2023 жылдан бастап тіркеліп тұрғанын анықталғанын баяндайды.
«Масқара! 2001 жылы қайтыс болған әкем 2023 жылдан бері емханада «тіркеуде» тұр! Жуырда тексерсем, Қызылордадағы «ДостарМедLine» жекеменшік клиникасы әкемнің атына ашылған ЖСН-ді тауып алып, оны 2023 жылдан бастап өз емханаларына заңсыз тіркеп қойғанын білдім. Емханаға барып сұрасам, беттері шімірікпей: «Бұл еркін тіркелу науқанымен келген. Бірақ 2023 жылдан бері емханаға келмеген» деп ақталады. 2001 жылы бақилық болған адам 2023 жылы қалай өз еркімен өтініш беріп, қол қояды?!», – деп жазды тұрғын.
Оқиғаға қатысты «ДостарМедLine» клиникасы ресми түсініктеме берген жоқ. Енді желі қолданушы құзырлы органдардан осы жағдайға байланысты жауап берулерін талап етпекші.
