USD
ҚЫЗЫЛОРДА. 9 қазан. Бүгін Қызылорданың Қазақ елі астанасы болғанына және халқымызға «қазақ» атауының қайтарылғанына 100 жыл толу мерейтойы аясында 320 пәтерлік 4 көп қабатты тұрғын үй кешені пайдалануға берілді. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Жаңа тұрғын үй кешені қаланың Сырдария өзенінің сол жағалауындағы аумағына орналасқан. Кейінгі жылдары ерекше қарқынмен дамыған сол жағалау сәулетті тұрғын үйлермен толыға түсті.
Салтанатты рәсімге зиялы қауым өкілдері, ел ағалары, қала тұрғындары қатысты.
Облыс әкімі Нұрлыбек Нәлібаев тұрғын үй құрылысы саласында атқарылған жұмыстарға тоқталып, жаңа қоныс иелерін құттықтады.
«Сыр өңірінде Президентіміздің, Үкіметтің ерекше қолдауымен тұрғындарды баспанамен қамтамасыз етуге бағытталған мемлекеттік әлеуметтік саясат нәтижелі іске асырылуда. Соңғы үш жылда қаржыландырудың барлық көзінен облысымызда 2 млн 500 мың шаршы метр тұрғын үй пайдалануға берілді. Кезекте тұрған азаматтарға 5 мыңнан астам пәтер сатып алынып, 25 мыңға жуық тұрғын қоныс тойын тойлады. – деді ол. – Барлық аудан орталықтарында жаңадан салынған 1500-ге жуық пәтер табысталды. Биыл бюджеттен тұрғын үй құрылысы мен жеке салушылардан дайын 3 800 пәтерді сатып алуға 58 млрд. 785 млн. теңге бөлінді. Қаржыландырудың барлық көзінен 870 мың шаршы метр тұрғын үй беріледі».
Әкімнің айтуынша, соңғы үш жылда Қызылорда қаласының өзінде 5 600 пәтер жерлестеріміздің игілігіне айналған. Өткен айда 280 пәтерлік 7 көп қабатты тұрғын үйге кезекте тұрған азаматтар қоныстанды.
Ерекше атап өтетін жайт, өткен жылдан бастап қалада заманауи жаңа дизайнмен 7, 9, 12 қабатты тұрғын үйлер бой көтеруде.
«Бүгін – мемлекет қолдауымен баспаналы болған әр отбасы үшін ерекше қуанышты күн! Жаңа баспаналарыңыздың іргетасы берік, қабырғасы мығым, әр отбасының шаңырағы татулық пен берекеге толы болғай!», – деді Нұрлыбек Машбекұлы.
Іс-шарада жаңа тұрғын үйді салған құрылысшыларға облыс әкімінің Алғыс хаты тапсырылып, Жалағаш ауданының құрметті азаматы, «Құрмет» орденінің иегері Өмірбек Шәменов құттықтау сөз сөйледі.
