Қырғыз-тәжік шекарасында жағдай ушығып, атыс болып жатыр

БІШКЕК. 27 қаңтар. Қырғыз-тәжік шекарасындағы жағдай тағы да күрделеніп кетіп, соңы атысқа ұласты. Бұл туралы «24.kg» хабарлады.

Порталдың хабарлауынша, шекарада казармалық жағдай жарияланған.

Қырғыз сайтының жазуынша, 27 қаңтар күні кешке Тәжікстан шекарашылары Баткен – Исфара жолының Баткен ауданының Торт-Кочо деген жерініің бөлігін біржақты тараптан жауып тастаған. Содан кейін оқиға орнына Баткен шекара отрядының бастығы Рустам Миршакиров пен Шекара қызиет басқармасының бастығы, полковник Кыялбек Толонбаев барған. Баткен облысындағы шекараның осы бөлігіне орналасқан шекара бөлімшелері қызмет етудің күшейтілген режиміне көшірілді.

Исфара қаласы мэриясының баспасөз хатшысы Зубайдулло Шомадов «Sputnik Таджикистан» сайтына инциденттің Тәжікстан азаматтарының Сомониен қишлағынан Чоркух жамоатына бара жатқан көліктеріне тас жаудырылғаннан кейін орын алғанын мәлімдеді.

Ал «24.kg» сайтының жазуынша, шекарадағы ахуалды қазір әскерилер мен күштік құрылымдар бақылауда ұстап тұр. Исфара – Ош жолы жабылған. Жергілікті тұрғындардың айтуларынша, шекарада екі ел әскери қызметкерлері арасында атыс болып жатқан көрінеді.