USD
ҚЫЗЫЛОРДА. 2 тамыз. Премьер-министрдің бірінші орынбасары Нұрлыбек Нәлібаев Үкімет басшысының тапсырмасымен Қызылорда облысына жұмыс сапарымен келді. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Сапар барысында ол Президент саябағы аумағында бой көтерген 15 көп қабатты тұрғын үйдің құрылысымен танысты. Құны 22 млрд теңгені құрайтын жоба аясында 945 пәтер қатарға қосылады. Нысандарды биылғы қазан айында тапсыру жоспарланған.
Бұдан кейін Нұрлыбек Нәлібаев облыс орталығында салынып жатқан «Қызылорда Арена» көп функционалды спорт кешенінің құрылысын көрді. Жалпы құны 20,1 млрд теңгеден асатын, аумағы 26 мың шаршы метрді алатын кешенде 50 метрлік жүзу бассейні, 2500 орындық әмбебап спорт залы және 300 орындық конференция залы орналасады. Қазіргі таңда онда әрлеу, инженерлік желілерді жүргізу және абаттандыру жұмыстары жүргізілуде. Нысанды биыл пайдалануға беру межеленіп отыр.
Құрылыс басындағы жұмыстардың жай-жапсарына қаныққан Премьер-министрдің бірінші орынбасары жауапты сала мамандарына барлық жұмысты сапалы атқарып, белгіленген мерзімде аяқтауды, құрылыс сапасын тұрақты бақылауда ұстауды тапсырды.
