USD
ПАРИЖ. 6 тамыз. Қазақстанның Олимпиада бокс турнирінде қыздар арасында жартылай финалға шыққан жалғыз өкілі Назым Қызайбай (суретте) бүгін Қытайдың Ву Ю атты атлетімен сынға түседі. Бұл туралы rast.kz хабарлайды.
Жекпе-жек түнгі сағат 01:02-де басталады. Ол «Қазақстан» телеарнасынан тікелей эфирде көрсетіледі.
Жартылай финалдың келесі жұбында түрік қызы Бусе Наз Чакироглу мен филиппиндік Айра Виллегас күш сынасады.
Жалпы, бүгін әйелдердің бұдан басқа 66 келіге дейінгі салмағында жартылай финалдық шайқас өтсе, 60 келіге дейінгі салмақта финалдық айқас болады.
Ерлер 71 келіге дейінгі салмақта жартылай финалдық шайқасқа түседі.
Бұлардың бәрі түнгі сағат 00:30-да «Қазақстан» телернасында басталатын тікелей эфирде көрсетіледі.
Ал ертең, 7 тамыз күні түнде біздің 80 келіге дейінгі салмақтағы саңлағымыз Нұрбек Оралбай украин Олександр Хижнякпен алтын медальді сарапқа салады. Шайқас түнгі сағат 01:51-де басталады.
