USD
АСТАНА. 6 ақпан. Бүгін Премьер-министр болып тағайындалған Олжас Бектенов жаңа Үкіметтің құрамына 4 жаңа министр әкеліп, команданы негізінен сақтап қалды. Бұл туралы Kazinform ақпарына сүйенген rast.kz хабарлайды.
Алдымен Президент оның орнына Президент әкімшілігінің басшысы етіп Айбек Дәдебаевты тағайындады. Ал кешке қарай Олжас Бектенов басқаратын Министрлер кабинетінің құрамы да белгілі болды.
Kazinform жаңа Үкіметтің осы ішінара өзгерген құрамына шолу жасады. Төменде
«Бәйтеректен» – Ұлттық экономикаға
Әңгімені төрт жаңа есімнен бастайық. 48 жастағы Нұрлан Серікұлы Байбазаров Ұлттық экономика министрі болған Әлібек Қуантыровтың орнына жайғасты. Бүгінге дейін «Бәйтерек» ұлттық басқарушы холдингін басқарған ол қызметтегі 23 жылының көбін квазимемлекеттік секторда өткерген. «Қазақстанның Даму Банкі», «Қазақстан темір жолы», «ҚазМұнайГаз», «Өнеркәсіпті дамыту қоры» компанияларында жұмыс істеген Нұрлан Байбазаров экс-министр Әлібек Қуантыровтың қосылған құн салығын төлейтін тұлғалардың қатарын кеңейту арқылы бюджет тапшылығын жою туралы бастамасын не істейтіні қызық.
Мәжіліс комитетінен – Қаржы министрлігіне
Нұрлан Байбазаров министрлік лауазыммен қатар Премьер-министрдің орынбасары қызметін қатар алып жүреді. Бұл міндет оған Қаржы министрі болған Ерұлан Жамаубаевтан қалды деп топшылауға болады. Олай дейтініміз, оның орнына келген Мәди Төкешұлы Тәкиев тек министрлік лауазымын атқарады.
Еңбек жолын есепшіліктен бастаған Мәди Тәкиев 1 сәуірде 46-ға толады. Салық органдарында түрлі лауазымдар атқарған ол 2019-2020 жылдары ҚР Ұлттық экономика вице-министрі болса, 2020-2023 жылдары Президент әкімшілігінің әлеуметтік-экономикалық мониторинг бөлімінің меңгерушісі ретінде жұмыс істеді. 2023 жылғы наурыздан бастап Мәжілістің қаржы және бюджет комитетінің төрағасы болып жұмыс істеп келді.
Президент күзетінен – ТЖМ-ге
Төтенше жағдайлар министрі болып тым көп уақыт отыра алмаған Сырым Шәріпхановтың орнына келген Шыңғыс Сайранұлы Әрінов 2006 жылдан 2022 жылға дейін Мемлекеттік күзет қызметінде түрлі сатыдан өтіп, шыңдалған. 40 жастағы жаңа министр 2022 жылдың қаңтарынан бүгінге дейін Қазақстан Республикасы Президентінің өкімімен Қазақстан Республикасы Мемлекеттік күзет қызметі бастығының орынбасары — Президент күзет қызметінің бастығы болып келді.
Депутаттықтан – Денсауминге
Бұрынғы Премьер-министр Әлихан Смайловтың кабинетіндегі үш әйел министрдің бірі болған Ажар Ғиният қызметімен қоштасқанымен, орнына тағы бір нәзік жан келді. Ол – Сенат депутаты Ақмарал Шәріпбайқызы Әлназарова.
52 жастағы Ақмарал Әлназарова – медицина ғылымдарының докторы. Педиатр маман Қызылорда облысының денсаулық сақтау саласында басшылық қызметтер атқарып, жергілікті мәслихат депутаты болды. Сенаттағы депутаттық мандатында да денсаулық саласының өзекті проблемаларын ұдайы көтеруімен есте қалды.
Тағы бір мүмкіндік берілгендер
Мемлекет басшысының Жарлықтарымен 37 жастағы Марат Кәрімжанұлы Қарабаев Қазақстан Республикасының Көлік министрі, 54 жастағы Ермек Боранбайұлы Маржықпаев Туризм және спорт министрі, 49 жастағы Аида Ғалымқызы Балаева Қазақстан Республикасының Мәдениет және ақпарат министрі, 56 жастағы Нұржан Молдиярұлы Нұржігітов Қазақстан Республикасының Су ресурстары және ирригация министрі, 42 жастағы Саясат Нұрбек Ғылым және жоғары білім министрі, 62 жастағы Ерлан Нұрәліұлы Нысанбаев Экология және табиғи ресурстар министрі, 54 жастағы Ғани Бектайұлы Бейсембаев Оқу-ағарту министрі, 40 жастағы Бағдат Батырбекұлы Мусин Қазақстан Республикасының Цифрлық даму, инновациялар және аэроғарыш өнеркәсібі министрі, 57 жастағы Айдарбек Сейполлаұлы Сапаров Ауыл шаруашылығы министрі, 53-тегі Алмасадам Майданұлы Сәтқалиев Энергетика министрі, 46 жастағы Арман Абайұлы Шаққалиев Қазақстан Республикасының Сауда және интеграция министрі, 42-дегі Қанат Бисимбайұлы Шарлапаев Өнеркәсіп және құрылыс министрі, 55 жастағы Светлана Қабыкенқызы Жақыпова Еңбек және халықты әлеуметтік қорғау министрі, 44 жастағы Азамат Несіпбайұлы Есқараев Әділет министрі қызметтерінде қалды.
21 министрдің үшеуі әйел
Сондай-ақ, Конституция бойынша Президент өз бетімен тағайындайтын үш министр де орындарын сақтап қалды. Атап айтсақ, Мұрат Әбуғалиұлы Нұртілеу Қазақстан Республикасы Премьер-министрінің орынбасары – Сыртқы істер министрі лауазымына, Ержан Сапарбекұлы Сәденов Қазақстан Республикасының Ішкі істер министрі лауазымына, Руслан Фатихұлы Жақсылықов Қорғаныс министрі лауазымына қайта тағайындалды.
Бұрынғы Қаржы министрі Ерұлан Кенжебекұлы Жамаубаевтан басқа вице-премьерлер де қызметтерінде қалды.
Жаңа кабинеттің жасына келсек, ең жас министр Көлік министрі Марат Қарабаев болып тұр. Ал ең егде жастағы Экология және табиғи ресурстар министрі Ерлан Нысанбаевтың зейнет жасына жетуіне бір жылдай ғана уақыт қалған. Жалпы, Министрлер кабинетіндегі 21 министрдің үшеуі – әйел затынан.
