USD
АСТАНА. 13 тамыз. Қазақстанда алғаш рет тамырда біртіндеп сіңірілетін жаңа буын каркастарын қолдану отасы жүзеге асырылды. Бұл туралы Денсаулық сақтау министрлігі баспасөз қызметінің дерегіне сүйенген rast.kz хабарлайды.
«Кардиология және ішкі аурулар ғылыми-зерттеу институтында төрт пациентке биорезорбцияланатын магний скаффолдтарын қолдану арқылы жоғары технологиялық операциялар жасалды», – делінген хабарламада.
Кардиология және ішкі аурулар ғылыми-зерттеу институтында жаңа буынның биорезорбцияланатын магний скаффолдтарын қолдана отырып, жоғары технологиялық коронарлық араласулар жүргізілді. Бұл технология интервенциялық кардиология бойынша халықаралық мастер-класс шеңберінде төрт пациентке қолданылды.
Магний скаффолды – тарылған коронарлық артерияға орнатылатын және қан ағымын қалпына келтіруге көмектесетін уақытша тамырлық каркас. Оның дәстүрлі металл стенттен негізгі айырмашылығы – өз функциясын орындағаннан кейін каркас организмге біртіндеп сіңіп кетеді.
«Мұндай технология тамырдың каркастың қолдауымен қалпына келу кезеңінен өтуіне мүмкіндік береді, содан кейін ол біртіндеп резорбцияланады. Бұл тамыр қабырғасының табиғи қалпына келуіне қосымша мүмкіндіктер ашады», – деп атап өтті КІА ҒЗИ рентгенэндоваскулярлық операциялық блогының меңгерушісі Алексей Колесников.
Жаңа технологияны тәжірибеде қолдану интервенциялық кардиология саласындағы жетекші мамандардың қатысуымен өткен мастер-класс шеңберінде жүзеге асырылды. Шақырылған сарапшы – Klinikum Fürth (Германия) клиникасының интервенциялық кардиология маманы, күрделі коронарлық араласулар жүргізу бойынша сарапшы доктор Стильянос Пиксарас.
Мастер-класс барысында қазақстандық мамандар биорезорбцияланатын скаффолдтарды қолданудың заманауи тәсілдерімен, пациенттерді іріктеу өлшемшарттарымен және коронарлық артериялардың күрделі зақымдануы кезінде араласу жүргізудің ерекшеліктерімен танысты.
Төрт операцияның барлығы да сәтті өтті. Пациенттерге жоғары технологиялық медициналық көмек МӘМС шеңберінде тегін көрсетілді.
Интервенциялық кардиологияның заманауи технологияларын енгізу коронарлық тамырлар аурулары бар пациенттерді емдеу мүмкіндіктерін кеңейтуге және Қазақстанда жоғары технологиялық медициналық көмектің қолжетімділігін арттыруға мүмкіндік береді.
Бұл, сөз жоқ, Қазақстан медицинасын дамытудағы кезекті үлкен бетбұрыс, серпінді серпіліс болып табылады.
