USD
АЛМАТЫ. 19 қыркүйек. Алматыда жыл сайынғы дәстүр бойынша Қала күніне орай ұйымдастырылатын ауқымды іс-шаралардың бірі ретінде алма жәрмеңкесі де өтіп жатыр. Бұл туралы aqshamnews.kz ақпарына сілтеме жасаған rast.kz хабарлайды.
Биыл жәрмеңкенің сауда орындары Қазыбек би көшесінің Панфилов пен Назарбаев көшелерімен қиылысар тұсы аралығына орналасты. Ол таңертеңгі сағат 10:00-де өз жұмысын бастап кетті. Ол кешкі сағат 18:00-ге дейін созылады.
Биыл алма жәрмеңкесі екі күн қатарынан өтеді. Оған көптеген шаруа қожалығы қатысып, алманың 50-ге жуық сортын ұсынады. Жәрмеңкеге 200 тоннадан астам алма жеткізілді.
Алманың отаны саналатын Алматыда өтетін мерекелік алма жәрмеңкесі қала тұрғындары үшін дәстүрлі шараға айналған. Жыл сайын жәрмеңкені асыға күтетін тұрғындар алманың түрлі сорттарының дәмін татып, отбасымен бірге уақыт өткізуді дәстүрге айналдырған. Сонымен қатар Алматыға келген отандық және шетелдік туристер де қаланың әйгілі алмасының дәмін татуға ерекше қызығушылық танытады.
Жәрмеңкеге келген көптеген шетелдік туристер шараны жоғары бағалап, қала әкімдігіне алғыстарын білдірді. Олар Алматының алмаларымен танысып, жергілікті өнімдердің дәмін татуға мүмкіндік алғанына қуанышты екенін атап өтті.
Қала күніне орай сондай-ақ мемлекеттік академиялық қуыршақ театры бойлы қуыршақтардың, әйгілі ертегі кейіпкерлерінің, көңілді клоундардың қатысуымен мерекелік шеру ұйымдастырды.
Шара шеңберінде бір алаңға 1000 жас суретшіні біріктірген ауқымды «Almaty: Bala.Art – Мың бала» балалар пленэрі өтті.
Бұдан бөлек, қаланың түрлі алаңдарында тұрғындар мен қонақтарға арналған көрмелер қанат жайып, Алматының тарихы, мәдениеті, өнері мен шығармашылық әлеуеті таныстырылуда.
Алматы қаласы әкімдігінің қолдауымен, Алматы қаласы музейлер бірлестігінің ұйымдастыруымен қаланың бірнеше алаңында көрмелер көген созды.
Алматы метрополитенінің «Алмалы», «Жібек жолы», «Сайран», «Сарыарқа» және «М. Әуезов атындағы драма театры» бекетінде дәстүрлі фотокөрме қатарға тұрды. Ертең кешке дейін жалғасатын экспозицияда метро жолаушыларына Алматының тарихы, мәдениеті, өнері мен сәулетіне арналған фотосуреттер мен ақпараттық материалдар бар.
