Нәрікбаев: Еуропаның жоғары білімі Қазақстандағыдан арзан
АСТАНА. 10 қараша. KAZGUU университетінің басқарма төрағасы Талғат Нәрікбаев Еуропа елдерінің барлығында жоғары білімнің ақысы біздің елімізге қарағанда анағұрлым арзан екенін мәлімдеді. Бұл туралы аталмыш оқу орны баспасөз қызметінің дерегіне сүйенген rast.kz хабарлады.
«Меніңше, студент жоғары білім үшін ақша төлемеуі тиіс. Осы уақытқа дейін Еуропада жоғары білім ақысы арзан болғанына таңғалатын едік. Мысалы, Испания студенттері жылына бір мың еуро төлейді. Ал Қазақстанның кейбір жоо-ларда оқу ақысы одан әлдеқайда қымбат. Испаниялық ректордан оқытушыларының жалақысын сұрағанымда, айына 4-5 мың евро айлық алатынын айтты. Өйткені, мемлекет оқу орындарын тікелей қаржыландырып, айлықты да өзі төлейді. Сондықтан олар қосымша шығындарын өтеу үшін ғана студенттен жылына 1 мың еуро алады», – деп түсіндірді өзінің бұл жөніндегі ойын Талғат Нәрікбаев.
Басқарма төрағасының айтуынша, Қазақстан жоғары оқу орындары студентке клиент есебінде қарайды. Шын мәнісінде, университеттің клиенті студент емес – жұмыс беруші. Өйткені, нарықта жұмыс берушіге сапалы білім алып шыққан, бәсекеге қабілетті мамандар қажет.
«Менің ойымша, жоғары білім бизнеске айналмауы керек. Студент жоғары білім үшін ақша төлемеуі тиіс. Университет негізінен халқына, еліне қызмет етуі шарт. Университет – коммерциялық емес, әлеумет алдындағы жауапкершілігі бар ұйым. Студенттердің білімі мен тәжірибесін олардың ақшалары есебінен дамыту мүмкін емес. Себебі, сапалы білім беруді ұйымдастыруда аз қаражат жұмсалмайды. Сондықтан білім сапасын арттырғымыз келсе, оқытушылардың жалақысын мемлекет тікелей қаржыландыруы керек (Испания, Германия немесе Нидерландтағыдай), ал университет қаржыландырудың басқа көздерін қарастыруы қажет. Мысалы, КАЗГЮУ жеке ақылы курстарды, біліктілікті арттыру бағдарламаларын ұсынады, ғылыми зерттеу жұмыстарын жүргізеді. Сондай-ақ Эндаумент қоры бар. Онда біздің түлектеріміз, меценаттар студенттерді оқытуға және университеттің материалдық-техникалық базасын жақсартуға көмектеседі», – дейді Талғат Мақсұтұлы.
Талғат Нәрікбаев бұл туралы Қазақстан студенттері альянсы мүшелерімен және жоғары оқу орындарының 100-ден астам белсенді жастарымен болған онлайн-кездесуі кезінде мәлімдеді.
