Қырғызстанның экс-президенті 11,2 жылға сотталды
БІШКЕК. 23 маусым. Первомайский аудандық соты Қырғызстанның экс-президенті Алмазбек Атамбаевты 11 жыл, 2 айға соттап, дүние-мүлкін тәркілеу жөнінде үкім шығарды. Бұл туралы «Азаттық» радиосы хабарлады.
Атамбаевқа үкім «Қылмыстық топ жетекшісі Азиз Батукаевты заңсыз босату ісі» бойынша жарияланды.
Прокурорлар 16 маусымдағы сот отырысында Атамбаевты 15 жылға соттауды сұрады.
Сот отырысы жабық режимде өтті.
Үкімге сай, Атамбаев «Данакер», екінші дәрежелі «Манас», «Данқ» ордендерінен, президентке берілетін сағаттан айырылады. Сот Атамбаевтың өзінің және жақындарының мүлкін тәркілеуге үкім шығарды. Тәркіленуі тиіс мүліктердің арасында 5 көлік, Шу мен Ыстықкөл облысындағы үйлер мен жер учаскелері – барлығы 10 нысан бар.
Атамбаевтың меншігіндегі «Медиа Форум», «Форум», «Автомаш-Энерго», «Апрель ТВ» компаниялары да тәркіленеді.
Сот үкімі әлі күшіне енген жоқ, айыпталушының апелляциялық шағым түсіруге құқығы бар.
Қырғызстанның шешен ұлтты тумасы Азиз Батукаев 2006 жылы 16,8 жылға сотталған. Оған «Адам өлтіруге қатысты; заңсыз жолмен қару дайындап, сатты; жаппай бассыздықтар ұйымдастырды» деп айып тағылған. Ол 2021 жылы түрмеден шығуы тиіс еді.
Батукаев 2013 жылы Нарындағы түрмеден «денсаулығына байланысты» мерзімінен бұрын босатылған. Дәрігерлердің берген анықтамасында оның «ауыр сырқатқа ұшырағаны» жазылған. Сол кезде ол Бішкектің халықаралық әуежайына жеткізіліп, Грозныйға ұшып кеткен. Кейін Қырғызстанның құзырлы органдары «Батукаев денсаулығына қатысты анықтаманы өтірік жасатып алды, оны босатуға биліктегілер атсалысты» деп мәлімдеген. 2019 жылы Қырғызстан ІІМ Батукаев ісін қайта тергеген.
Атамбаевқа бұдан бөлек Кой-Таштағы оқиғаға қатысты «Адам өлтіру», «Кепілге алу», «Бұзақылық», «Билік өкіліне күш қолдану» сынды баптармен де қылмыстық іс қозғалған.
2019 жылы 7-8 тамызда Шу облысы Аламудун ауданындағы Кой-Таш ауылында «Алмазбек Атамбаевты тергеуге мәжбүрлеп жеткізу» операциясы кезінде күштік құрылымдар мен саясаткер жақтастары арасында қақтығыс орын алған. Ауыр жараланған арнайы жасақ өкілі көз жұмды, бірнеше адам зардап шекті. 200-ден астам адам жараланды. 8 тамызда Алмазбек Атамбаев пен жақтастары билікке өз еркімен берілген. Ол содан бері қамауда отыр.
