USD
АЛМАТЫ. 8 мамыр. Қазақстандық бизнесмен Тимур Құлыбаев өзінің бағынысындағы компанияның меншігі болып табылатын «Алматы» халықаралық әуежайын Түркия холдингіне сатты. Бұл туралы «Интерфакс-Қазақстан» хабарлады.
«Түркияның «TAV Airports» холдингі өзінің концоруциум бойынша әріптесі «VPE Capital» компаниясымен бірге «Алматы» халықаралық әуежайының 100 пайыздық акциясын сатып алды. Сауда-саттықтың мәмілесі 415 миллион долларға тоқталған», – делінген агенттік хабарламасында.
«TAV Airports» холдингінің мұндағы үлесі 75 пайыздан кем емес, ал акцияларды өткізу барлық заңдық процедуралар жасалып болғаннан кейін жүзеге асырылады.
Баспасөз қызметінің дерегіне қарағанда, «Алматы» әуежайы түрік холдингінің портфеліндегі 15-ші аэропорт болмақшы.
«Біз өзіміздің қоржынымызға «Алматы» аэропортының келіп қосылғанына қуаныштымыз, бұл Азия мен Еуропа арасындағы маңызды торапқа айналады, Алматы Қытайдан Еуропа мен Азияға тартылған «қазіргі заманғы Жібек жолының» бойында орналасқан. Қазақстан – аймақтағы географиялық жағынан да, экономикалық жағынан да ең ірі ел, ал Алматы – Қазақстанның жалпы ішкі өнімінің 20 пайызын бақылайтын елдегі ең ірі қала. Біз «Алматы» әуежайының өсуіне айтарлықтай әлеует бар деп есептейміз және білімімізге сүйене отырып, оны толық игеруге барымызды саламыз», – деп атап өтті «TAV Airports» холдингінің президенті Сани Шенер.
«Алматы халықаралық әуежайы» акционерлік қоғамының егесі болып табылатын Нидерландтың «Venus Airport Investments B.V» компаниясы өзінің үлесін сатып алатын талапкерді баяғыдан іздеп жүрген болатын. Қазақстан қор биржасының сайтындағы мәліметтерге сай, Амстердамда тіркелген «Venus Airport Investments B.V» компаниясының «Алматы халықаралық әуежайы» акционерлік қоғамының бірден-бір, яғни жалғыз акционері екенін білуге болады. Ал «Venus Airport Investments B.V», құжатта атап көрсетілгендей, өз кезегінде Тимур Құлыбаевтың Сингапурда тіркелген «Steppe Capital Pte. Ltd» компаниясына толығымен бағынады.
Түріктің «TAV Airports» холдингіне Ыстанбұлдағы Ататүрік атындағы әуежай қарайды. Компания Латвияда, Хорватияда, Солтүстік Македонияда, Сауд Арабиясы мен Тунисте бірқатар терминалдарға егелік етеді, сондай-ақ өзінің әріптесі – франциялық ADP компаниясымен бірге әлемнің 40 аэропортында қызмет көрсетеді.
Алматы әуежайы – 1935 жылы салынған, Қазақстандағы ең ірі әуе гаваны. 2019 жылы мұнда 6 млн 422 мың 721 адамға қызмет көрсетілді.
