USD
АСТАНА. 23 қыркүйек. Қазақстан Халық Кеңесінің бүгін өткен бірінші сессиясында Мемлекет басшысының ұсынысымен Ерлан Қошанов оның төрағасы болып сайланды. Бұл туралы Ақорда баспасөз қызметінің дерегіне сүйенген rast.kz хабарлайды.
Президент Қасым-Жомарт Тоқаев Қазақстан Халық Кеңесінің бірінші сессиясына қатысты.
Сессияда бірінші болып сөз алған Мемлекет басшысы Қазақстан Халық Кеңесінің төрағасы лауазымына Ерлан Қошановтың кандидатурасын ұсынды.
«Бұл – конституциялық мәртебесі бар, беделді лауазым. Сондықтан бұл лауазымға елге белгілі, халық пен биліктің арасында дәнекер болатын азамат келуге тиіс деп санаймын. Осының бәрін ескере отырып, мен Ерлан Жақанұлы Қошановтың кандидатурасын ұсынамын. Бұл азаматты бәріңіз жақсы білесіздер, жауапкершілігі жоғары, білікті, тәжірибесі мол тұлға. Ол мемлекеттік қызмет жүйесінде ұзақ жыл еңбек етті, бұл жұмысты абыроймен атқарды. Мәжіліс төрағасы ретінде ауқымды реформаларды іске асыруға белсене атсалысты. Енді Халық Кеңесі төрағасы ретінде табысты жұмыс істеп, қоғамдық келісімді нығайтуға мол үлес қосатынына күмәнім жоқ. Сондықтан Ерлан Жақанұлы Қошановтың кандидатурасына мұқият назар аударып, қолдайсыздар деп сенемін», – деді Қасым-Жомарт Тоқаев.
Сонымен қатар Президент консультативтік мекемеге кәсіби білігі жоғары мамандар, абырой-беделі зор, нағыз отаншыл азаматтар мүше болғанын айтты.
«Олардың қатарында жұртшылыққа белгілі тәжірибелі тұлғалар, мемлекет және қоғам қайраткерлері, кәсіпкерлер мен көптеген белсенді азаматтар бар. Құрылтайдың алғашқы отырысында айтып өткенімдей, ауқымды реформалардың арқасында мемлекеттік басқару ісіне жаңа, жасампаз, озық ойлы азаматтардың келуіне жол ашылды. Ел мүддесі үшін адал қызмет ету – зор мәртебе әрі қастерлі парыз. Осы орайда, сіздерге – Халық Кеңесінің әрбір мүшесіне ерекше жауапкершілік жүктеліп отыр. Сіздер ел игілігі үшін табанды еңбек етіп, мемлекеттігімізді нығайтуға зор үлес қосасыздар деп сенемін. Ырысты ынтымағымызды, қоғамдық келісімді күшейту үшін белсенді түрде еңбек етесіздер деп ойлаймын», – деді Мемлекет басшысы.
Дауыс беру қорытындысы бойынша Ерлан Қошанов Қазақстан Халық Кеңесінің төрағасы болып сайланды.
Президент Қасым-Жомарт Тоқаев Қазақстан Халық Кеңесінің алдында тұрған міндеттерге ертең өтетін алғашқы сессияның негізгі отырысында кеңірек тоқталады деп күтіліп отыр.
Айта кетейік, Ерлан Жақанұлы Қошанов 1962 жылғы 14 тамызда Қарағанды облысының Ақсу-Аюлы кентінде туған. 2017-2019 жылдары Қарағанды облысының әкімі болған. 2019 жылғы 18 қыркүйектен Президент Әкімшілігін басқарды. 2022 жылы 1 ақпанда өз еркімен доғарысқа кеткен Нұрлан Нығматулиннің орнына Парламент Мәжілісінің VII шақырылым депутаты болып тіркеліп, Мәжіліс төрағасы болып сайланды. 2023 жылғы 29 наурызда Мәжілістің VIII шақырылым төрағасы болып қайта сайланып, 2026 жылғы 1 шілдеге дейін атқарды.
