USD
НОВОСІБІР. 11 тамыз. Ресей президенті Владимир Путин келердің алдында Новосібірде жергілікті тұрғындардың қала ішінде жүріп-тұруларына шектеу қойылды. Бұл туралы The Moscow Times ақпарына сілтеме жасаған rast.kz хабарлайды.
«НеМосква» паблигі хабарлағандай, Сібірдің орталығы іспетті шаһар азаматтарына мемлекет басшысының кортежі жүріп өткенше көше бойларына бейсеубет шығып кетуден бас тарту, өздері тұратын үйлердің терезелеріне жақындамау, сондай-ақ «электронды және оптикалық қондырғыларды пайдаланбау» ұсынылған.
Осыған ұқсас нұсқауларды Новосібір мемлекеттік университетінің жатақханасында қалған студенттер де алған. Кампус бойымен еркін жүріп-тұруға да тыйым салынған. Ал университет оқу-ғылыми орталығының әдетте митингілер өтіп тұратын жаңа ғимараттары айналасында шарбақты қоршаулар пайда болған. Сол сияқты Академқалашықтың үлкен бөлігі мен орталық көшелерінде тұрған самокаттарды жалға алуға шектеу салынған.
Путин Новосібірге 11 тамызға қараған түні ұшып келді. Полицейлер дүйсенбі күннің кешінен бастап президент жүретін жолдың әр елу метрлік бөлігіне кезекші болып сапқа тұра бастайды. Академқалашықты орталықпен байланыстыратын Большевицкая көшесі бойында мемлекеттік автоинспекцияның көптеген қызметкерлері жиналып жатқаны байқалған.
