Ресейде Жеңіс парадын өткізу кейінге қалдырылды
МӘСКЕУ. 17 сәуір. Ресей президенті Владимир Путин коронавирус індетіне байланысты Жеңіс парады жыл ішінде кейінірек өткізілетінін жариялады. Бұл туралы РИА «Новости» хабарлады.
Ресей басшысы мұны Қауіпсіздік кеңесінің мүшелерімен кездесу кезінде мәлімдеді.
«Азаматтардың өмірлерін қатерге тігетін тәуекелшілдік кеткеннен кейін елдегі барлық салтанатты шаралар міндетті түрде өткізілетін болады», – деді Путин. Мемлекет басшысы қабылданған осы шешімге байланысты Қорғаныс министрі Сергей Шойгуге, сондай-ақ күштік ведомство басшыларына Қызыл алаңдағы әскери парад пен аймақтардағы парадтардың кестесіне өзгеріс енгізіп, дайындықты кейінге қалдыруды тапсырды.
«Біз 2020 жылы Жеңіс күні құрметіне жасалатын барлық шараларды міндетті түрде өткіземіз, Мәскеуде парад та болады, Өшпес полктың маршы да болады», – деді президент.
Владимир Путин 15 сәуір күні ресейлік ардагерлер ұйымдарына үндеу жазып, онда коронавирусқа байланысты Жеңіс парадын өткізуді кейінге қалдыруды өтінді. Хатта парад қатер әкелмеуі керектігі, оның «шын мәнінде қатысушылардың барлығы үшін бейбітшілік пен қауіпсіздіктің салтанатына» айналуы керектігі атап өтілді.
Жеңіс парадының нақты өтетін уақыты әзірге белгісіз.
