USD
АҚТӨБЕ. 5 тамыз. Премьер-министрдің бірінші орынбасары Нұрлыбек Нәлібаев Ақтөбе облысындағы жұмыс сапарының екінші күнін өңірдің стратегиялық жобаларды жүзеге асыруы барысымен танысуға арнады. Бұл туралы Ақтөбе облысы әкімі баспасөз қызметінің дерегіне сүйенген rast.kz хабарлайды.
Мәртебелі мейман бүгін аймақтың көлік инфрақұрылымы, өнеркәсіп, тұрғын үй-коммуналдық шаруашылық, цифрландыру салаларындағы жобаларды және әлеуметтік нысандар құрылысын көрді.
Президент қолдауымен атқарылып жатқан жобалар ең алдымен халықтың жайлы тұрмысын, өңірдің әлеуметтік-экономикалық өркендеуін көздейді. Ауқымды жұмыстардың барлық кезеңі, мәселелері Үкімет бақылауында тұр.
Премьер-министрдің бірінші орынбасары Нұрлыбек Нәлібаев бірқатар нысандарды аралап көргеннен кейін облыс активімен жиын өткізді. Онда өңірдің әлеуметтік-экономикалық дамуы, инвестиция тарту, өнеркәсіпті дамыту және Мемлекет басшысының тапсырмаларын орындау мәселелері қаралды. Осының ауқымында аймақтың әлеуметтік-экономикалық дамуын жаңа деңгейге көтеру мүмкіндіктері талқыланды. Атап айтқанда, инвестициялық жобаларды уақытылы іске қосу, «Ақтөбе» арнайы экономикалық аймағына жаңа өндірістер тарту, ауыл шаруашылығын қаржыландыру және техникалық жаңғырту жұмыстары бойынша нақты міндеттер қойылды.
Әрі қарай «109» ахуалдық орталығында мемлекеттік ақпараттық жүйелермен ықпалдастырылған цифрлық платформа, «Қазхром» ТҰК» АҚ Ақтөбе ферроқорытпа зауытында өндірістің даму жоспары таныстырылды.
Сапар аясында «Ақтөбе ЖЭО» АҚ-ның алдағы жылу маусымына дайындығы да қаралды. Жауапты тұлғаларға жөндеу жұмыстарын уақытында аяқтап, жылу беру маусымын тұрақты өткізу тапсырылды. Жоспар бойынша дайындық қыркүйекте бітуі тиіс.
Ақтөбедегі «Қоныс» спорт сарайының жанынан жаңа демалыс саябағы салынуда. Аумағы 1,6 гектарды алады, онда серуендеу және жүгіру жолақтары, балалар мен спорт алаңдары, амфитеатр және демалыс аймақтары қарастырылған. Қазіргі кезде құрылысы аяқталуға жақын. Мұндай қоғамдық кеңістіктер «Таза Қазақстан» экологиялық акциясының мақсаттарына сай келеді.
Сапар соңында Премьер-министрдің бірінші орынбасарына «Алтын Орда» шағын ауданындағы экономикалық-іскерлік аумақта іске асырылатын жобалар, музыкалық драма театр, 35 мың көрерменге арналған жаңа футбол стадионының құрылысы таныстырылды.
Қорытындысында өңірде қолға алынған инфрақұрылымдық жобаларды, барлық нысанның құрылыс сапасын бақылау тапсырылды.
