USD
УАШИНГТОН. 29 шілде. Кеше Украина лидері Володимир Зеленськиймен оңаша кездескен АҚШ президенті Дональд Трамп онымен әңгімелесудің өзі үшін зор құрмет екенін қадап айтты. Бұл туралы BBC ақпарына сілтеме жасаған rast.kz хабарлайды.
Алдын ала белгіленгендей, Володимир Зеленський 28 шілде күні Америкаға жұмыс сапарымен ұшып келді. Оны сол күні-ақ Дональд Трамп қабылдады.
Кездесу баспасөз өкілдерінің қатысуынсыз, жабық есік жағдайында өтті.
Екі мемлекет басшысының Ақ үйдегі кездесуі бір сағатқа жуық уақытқа созылды. Украина президентінің айтуынша, олар Домалақ кабинетте Patriot кешендері үшін зымырандар өндіру үшін лицензия беру мәселесін және «көмек беретін бірқатар басқа да идеяларды» талқылаған.
Бұл – екі президенттің соңғы екі айдағы үшінші кездесуі. Зеленський өзінің Трамппен өткен әңгімесін өте жақсыға бағалады, ал Трамптың өзі Truth Social әлеуметтік желісінде «кездесу өте жақсы өтті» деп жазды.
«Президент Трамппен Домалақ кабинеттегі жақсы кездесу. Украиндардың өмірлерін қорғау және бейбітшілікке жету үшін біздің бірге істеп келе жатқан жұмыстарымыз үшін рахмет!», – деп атап өтті Украина президенті Ақ үйден шыққаннан кейін көп ұзамай.
Сәл кейінірек АҚШ президентінің баспасөз хатшысы Кэролайн Левитт екі президенттің кездесуін, сондай-ақ Израиль премьері Нетаньяхуді (ол Ақ үйге Украина президентінің артынша келді) қабылдауды «оң және жемісті» әрекеттер ретінде бағалады.
«Мен үшін Украина президенті Зеленськиймен кездесу – үлкен құрмет. Біз көп мәселені талқыға салдық. Кездесу өте жақсы өтті!», – деп жазды соңыра Америка президенті.
