USD
МӘСКЕУ. 15 маусым. Ресей президенті Владимир Путин АҚШ президенті Дональд Трампқа қоңырау шалып, пікір алмасқанында Украинадағы соғысты тоқтата алмайтынын ашып айтты. Бұл туралы The Moscow Times ақпарына сүйенген rast.kz хабарлайды.
Ресей диктаторы сөзінде Ақ үйдің қожайынын 80 жылдығымен құттықтап, халықаралық күн тәртібінің негізгі тақырыптарын, соның ішінде Украинадағы соғысты талқылауға шақырды. Әңгіменің егжей-тегжейін Ресей мемлекеті басшысының көмекшісі Юрий Ушаков келтірді.
Оның айтуынша, Трамп Путинді соғысты «мүмкіндігінше тезірек» тоқтатуға шақырған және бұл «америкалық-ресейлік қатынастардың шынымен жаңа сапасын құру перспективаларын ашады» деп уәде берген. Сондай-ақ, АҚШ президенті еуропалық серіктестер мен Киевке, оның ішінде 15-17 маусымда G7 саммитінде болатын байланыстар барысында ықпал етуге дайын екенін білдірген.
«Ресей аумағындағы азаматтық нысандарға соңғы соққылар, әрине, реттеуге кедергі келтіреді. Бұл атап өтілді», дегенді қосты Ушаков.
«Бұған жауап ретінде Путин Трампқа «Киев режимінің Ресейдегі бейбіт инфрақұрылымға соққы беру әрекеті Украина үшін ұрыс алаңындағы қиын жағдайды өзгертпейді» дегенді айтты», – деп мәлімдеді Ушаков. Оның айтуынша, Путин G7 саммитінде еуропалық көшбасшылар мен Украина президенті Володимир Зеленський «бәрін керісінше ұсынуға тырысады», тек «қақтығысты кешіктіруге және соғыс қимылдарын жалғастыруға бағытталған идеяларды ұсынады» деп көсілді.
Ал Ушаков: «Егер Зеленський Путинмен кездесудің қажеттілігі туралы тағы бір рет айта бастаса, онда Мәскеуге келсін» деп жылмаңдады. Сондай-ақ, әңгіме барысында Ресей астанасына жақын арада америкалық келіссөз жүргізушілер Стив Уиткофф пен Джаред Кушнер келетіні келісілгені айтылды.
