USD
МӘСКЕУ. 30 мамыр. Ресейде бір жылдың ішінде екінші мәрте алкогольдік өнімдердің бағасы шарықтап өсіп шыға келді. Бұл туралы The Moscow Times ақпарына сүйенген rast.kz хабарлайды.
«Ресейде жыл басынан бері, 18 мамырдағы жағдай бойынша, арақтың бағасы орта есеппен 12,2%-ға шарықтап өсіп кетіп отыр», – деп баяндады ТАСС тілшісіне «Руспродсоюз» ассоциациясының атқарушы директоры Дмитрий Востриков. «Қазір жылдан жылға өсім 14,9%-ды құрап келеді» дегенді қосты ол бұған. Оның айтуынша, бағаның күрт қымбаттаушылығының басты себебі алкогольді өнімдердің акцизі көтерілуі болып табылады. «Тауардың соңғы бағасына тікелей әсер ететін» акциздік алымдардан бөлек, шикізат пен энергияның, логистика мен басқа да факторлардың бағалары өсуі де осыған апарып тұрады.
Биылғы 1 қаңтардан бастап 18 градустан жоғары өткір спиртті ішімдіктердің бағасы 740 рубльден 824 рубльге дейін артты. Осы тұста үкімет те арақтың көтерме саудадағы ең төменгі бағасын 409 рубльге дейін көтеріп жіберді. Мұның бәрінің сыртында соғыс тұрғаны тағы аян.
Осыған қарамастан, орыстардың арақты пайдалану деңгейі бір сүйем де төмен түскен жоқ. Керісінше оның мөлшері күрт артып келеді. «Соңғы сәуір айының қорытындысында арақтың көтерме саудадағы өсімі 3%-ға жуық көбейіп, 5,97 мон декалитрді (далды) құрады», – делінген «Росалкогольтабакконтроль» берген мәліметте.
«Алкпро» гильдясының президенті Андрей Московский «арақтың бағасы 17%-ға дейін секіріп кеткеніне қарамастан, ол қалған спиртті ішімдіктерге қарағанда, салыстырмалы түрде арзан, сондықтан тұтынушылардың көбі тап соған қарай ауып кетті» дегенді айтады. «Ресейліктер (орыстар) үнем тәртібінің талабына сәйкес, өз таңдауларын араққа бұрып жатыр» дегенді қосты бұған Ресей ұлттық алкоголь саясаты талдау орталығының басшысы Павел Шапкин.
