USD
БРЮССЕЛЬ. 22 сәуір. Еуроодақ елдерінің тұрақты өкілдері Киевке 90 млрд еуро көлемінде көмек көрсетуге алдын ала келісім берді. Бұл туралы DW ақпарына сүйенген rast.kz хабарлайды.
Еуропа одағы Украинаға 2026-2027 жылдарға арналған ауқымды несиені бекітудің соңғы процедурасында шешуші әрекетке көшті.
Одақ Украинаның 90 миллиард еуро несиесін түпкілікті бекітуге нақты қадам жасады, бұл мәселе бұған дейін Венгрияның ветосына байланысты бірнеше ай бойы шешілмей келген еді.
Еуроодақ елдерінің тұрақты өкілдері 22 сәуір, сәрсенбі күні ауқымды көмек пакетін ұсынуға алдын ала келісім берді. Мұның жай-жапсарын қазір ЕО-да ротация бойынша төрағалық ететін Кипр Республикасының елшісі жеткізді.
Енді несие беру мәселесі оны Еуроодақ кеңесі түпкілікті мақұлдау үшін жазбаша процедурадан өтеді. Жазбаша рәсім 23 сәуір, бейсенбіде түстен кейін аяқталады деп күтілуде.
DW-ның Брюссельдегі тілшісі атап өткендей, сөз ЕО-ның көп жылдық бюджетіне өзгерістер енгізу турасында болып отыр. Бұл – Киевке қажетті несиені беруді жолға қойып беретін соңғы техникалық элемент. Одақ елдері өкілдерінің шешімі несиені түпкілікті бекітуге жол ашады.
Украина үшін 2026-2027 жылдарға есептелген несиенің көлемі 90 млрд еуроны құрайды. Киев оны қазір бесінші жылға қараған РФ басқыншыларына қарсы соғысқа пайдаланады. Аталмыш кредит жөніндегі келісімге қол қою 2025 жылдың желтоқсанында басталған, бірақ Венгрияның қазір билік басынан кетіп жатқан Виктор Орбан бастаған үкіметі осыған табандатып тұрып қарсы шығып келген еді.
Биылғы сәуір айында өткен парламент сайлауынан кейін елде Петер Мадьяр бастаған «Тиса» партиясы жеңіске жетті. Осыдан кейін үкімет жоғарыдағы шешімді бұғаттауды тоқтатты. Сонымен бірге Будапешт ақша бөлу үдерісіні қатысқан жоқ, яғни өз тарапынан бір тиын да шығармады.
Экономика жөніндегі еурокомиссар Валдис Домбровскис 21 сәуірде Брюссель бірінші траншты мамырдың аяғы мен маусымның басына дейін төлейді деп күтетінін айтты.
