Азаматтығын ауыстырған ресейлік спортшылар елге кіргізілмейді
МӘСКЕУ. 12 ақпан. Ресей спорт министрлігі азаматтығын ауыстырған ресейлік спортшылардың елге кірулеріне тыйым салуды ұсынды. Бұл туралы The Moscow News ақпарына сүйенген rast.kz хабарлайды.
Ресейдің Спорт министрі және Олимпиада комитетінің президенті Михаил Дегтярев басқа елдердің намысын қорғап жүрген бұрынғы ресейлік спортшыларға қарсы түбегейлі шара қолдану қажеттігін мәлімдеді. VK Video платформасындағы «Орталық арна» бағдарламасында сөйлеген сөзінде шенді шенеунік оларды тек атақтарынан айырып қана қоймай, сонымен қатар Ресейге кіруге тыйым салуды ұсынды.
«Біз бұған қарсы күресіп жатырмыз. <…> Оларды барлық нәрседен айырып, елге кіруге және біздің спорттық нысандарымызды пайдалануға тыйым саламыз. Ал біз соған жетеміз», – деп атап өтті Дегтярев.
Ол мысал ретінде жақында болған бір жағдайды еске түсірді. Спорт министрлігі шахматшы Владимир Федосеевті Словения азаматтығына ауыстырғаннан кейін ресейлік гроссмейстер және спорт шебері атақтарынан айырды. «Мұнда біз оларды асыраймыз, оқытамыз, жаттықтырушылармен және нысандармен қамтамасыз етеміз, ал олар кенет паспортын бізге тастап, кетеді де қалады», – деді министр ашуланып.
Владимир Путин Украинаға қарсы соғыс ашқаннан кейін Халықаралық Олимпиада комитеті мен халықаралық спорт федерациялар ресейлік атлеттерді жарыстардан шеттетті, бұл ондаған ресейліктің мансабын жалғастыру үшін азаматтығын өзгертулеріне себеп болды.
РБК есептептеп шыққандай, тек Италиядағы Олимпиялық ойындарда ғана 30-дан астам ресейлік спортшы басқа елдердің туы астында бақ сынайды. Соның ішінде мәнерлеп сырғанаудан 18 спортшы басқа елдің намысын қорғағалы жатыр екен. Өткен жылдары Камилла Рахимова, Мария Тимофеева, Полина Кудерметова (Өзбекстан), Елена Рыбакина, Юлия Путинцева, Александр Бублик (Қазақстан), Анастасия Потапова (Аустрия) және Дарья Касаткина (Аустралия) сияқты онға жуық ресейлік теннисші азаматтығын ауыстырды.
